O Concello de Esgos gastou 27.000 euros en mercar unhas leiras que eran dun dos concelleiros do PP
O PSOE de Esgos denuncia que este concelleiro tamén votou a favor de comprarse unha leira a si mesmo con fondos públicos.
Por Europa Press / Redacción | SANTIAGO DE COMPOSTELA | 03/04/2019 | Actualizada ás 18:12
O PSOE de Esgos denunciou que un edil do Partido Popular deste municipio ourensán votou nunha xunta de goberno local a favor de comprarse a si mesmo unha leira para construír un tanatorio.
Nun comunicado, os socialistas aseguran que Camilo José Rodríguez aprobou en decembro de 2016, xunto cos restantes asistentes do grupo de goberno á sesión, a compra dunha serie de parcelas da súa propiedade, dos seus irmáns e do seu pai, exalcalde do PP nesta localidade.
O PSOE de Esgos cifra en 26.712 euros o valor das propiedades que "benefician directamente ao concelleiro e aos seus familiares". Ademais, indica que deste total, ao edil correspondéronlle 5.432 euros.
"Neste concello sempre lle pasan cousas boas aos mesmos", asegura o portavoz do grupo municipal socialista, Victor Pérez, que lamentou que unha infraestrutura "tan necesaria" como a do tanatorio "se vexa salpicada por irregularidades tan manifestas".
"A ética e a legalidade debe prevalecer sempre no uso do diñeiro público", asegura o portavoz que considera que os restantes integrantes do goberno municipal, especialmente o alcalde, que votaron a favor desta compra "son cómplices".
Ademais, o PSOE de Esgos lembrou que o edil implicado nesta cuestión "xa apareceu nas listas de enchufados do PP no seu día, por acceder a un posto de traballo público no Instituto Ourensán de Desenvolvemento Económico (Inorde), dependente da Deputación Provincial, cando o seu pai era alcalde do municipio".
