Enquisas: forte ascenso do PSOE, afundimento do PP e extinción do nacionalismo galego no Congreso

O Partido Socialista alcanzaría os 137 escanos nas eleccións xerais do 28 de abril, unha cifra que suporía 52 máis que hai tres anos e que lle permitiría tentar impulsar un goberno en coalición ou con apoio doutras forzas políticas, mentres que o PP rexistraría un considerable retroceso que o deixaría en 71 deputados.

Así o estima a enquisa de Sondaxe para La Voz de Galicia, realizada entre o 11 e o 18 de abril e que lle outorga ao PSOE dous puntos porcentuais máis respecto da do mes de marzo, ata alcanzar os 137 escanos, os mesmos que obtivo Mariano Rajoy en 2016.

Ciudadanos quedaría de terceira forza política, alcanzando os 50 deputados —tivo 32 en 2016— e Podemos perdería máis da metade de apoios cos que contaba ao quedar en 33 escanos fronte aos 71 de hai tres anos. A quinta formación en representantes no Congreso sería Vox, con ata 28 escanos, aínda que en valores inferiores aos 50 que Sondaxe lle outorgaba en marzo.

Con estas cifras, o Partido Socialista podería optar por un goberno con outras forzas políticas ou co seu apoio --a maioría sitúase nos 176 escanos--, xa sexan Cidadáns ou ben Podemos co apoio do PNV que, segundo Sondaxe, alcanzaría os 9 deputados. Esquerra Republicana de Catalunya obtería 11, o PDeCat 6, EH Bildu 2. Non obtería representación, en cambio, o BNG.

En cambio, a baixada do PP dificultaría a formación de goberno entre as forzas de dereitas, a pesar da subida de Cidadáns.

GALICIA

En canto aos datos de Galicia, Sondaxe estima que o PSOE superaría o PP, ao conseguir 10 representantes fronte aos 9 dos populares, mentres que Ciudadanos obtería dous e En Común-Unidas Podemos outros dous. Nin BNG nin En Marea —as forzas que puxeron en pasadas lexislaturas representantes do nacionalismo galego no Congreso— acadarían escanos, a día de hoxe.

Con todo, PP, BNG e o partido de ultradereita Vox dispútanse un escano pola provincia da Coruña, que se decidiría por apenas unhas décimas a favor duns ou doutros, por iso tanto Vox como BNG chegaron a aparecer en enquisas previas cun escano en Galicia, pero arestora, estarían fóra. En Marea ten 'imposible' conseguir representación, segundo Sondaxe.

MÁIS ENQUISAS

Outra enquisa de DYM Politics para prensa Ibérica, grupo editor do Faro de Vigo, atribúe iguala a suma entre PSOE e Unidas Podemos, por unha banda, e PP, Ciudadanos e Vox, polo outro, estarían case igualados, o que outorgaría a PNV e partidos independentistas cataláns un papel relevante.

En cifras, o PSOE ascendería ata situarse como primeira forza política, con entre 122 e 127 escanos —dez menos que na enquisa de Sondaxe—, mentres que o PP baixaría ata quedar con entre 80 e 86.

Dciudadanos situaríase como terceira forza política, cun 15,5% da porcentaxe de voto que lle permitiría obter entre 46 e 52 escanos, mentres que Unidas Podemos quedaría como cuarta opción, con entre 34 e 40 deputados. Vox irrompería no Congreso con entre 26 e 32 deputados. Datos similares aos de Sondaxe.

Desta forma, a suma de PSOE e Unidas Podemos suporía entre 156 e 167 deputados, mentres que PP, Cs e Vox computarían entre 152 e 170. Segundo a enquisa de DYM Politics, as forzas catalás e vascas poderían ser determinantes, a expensas de que os partidos maioritarios soliciten o apoio dos indecisos.