Reaccións dos partidos: en Común Unidas Podemos ve oportunidade de formar goberno

EN COMÚN UNIDAS PODEMOS

Así, destacaron que a "magnífica noticia" dos datos de participación nas xerais, que "evidencian que existe unha sociedade robusta" e que a cidadanía "entendeu que non eran unhas eleccións calquera". Ademais, indicaron que non realizarán comentarios ata que se teñan os resultados definitivos aínda que si cren que "cos datos na man" que manexan "é posible un goberno do cambio".

A enquisa a pé de urna de GAD3 outorga dous deputados a En Común Unidas Podemos en Galicia, un pola provincia da Coruña e outro por Pontevedra, circunscrición esta última na que poderían lograr un escano máis. Ao termo da breve comparecencia escoitáronse aplausos e berros de alegría por parte dos candidatos e o grupo de campaña de En Común, que seguían a comparecencia dos portavoces desde unhas escaleiras do espazo desde onde fan seguimento da xornada electoral.

CIUDADANOS

O secretario de Organización de Ciudadanos Galicia, Laureano Bermejo, eloxiou este domingo a "gran participación" alcanzada nestas eleccións xerais, un comportamento que, dixo, obedece ao desexo de "unhas perspectivas de goberno totalmente novas".

Nunha breve declaración despois do peche dos colexios electorais, Bermejo asegurou que na formación política senten "moi contentos" pola "gran participación" e pola cantidade de xente que "se desprazou ás mesas electorais para poder votar".

En todo caso, arroupado por simpatizantes e membros das candidaturas, nunha noite electoral que Cidadáns Galicia segue nun hotel compostelán, o secretario de Organización deixou a valoración dos resultados para cando se coñezan os datos.

No entanto, recoñeceu que, "a priori", as cifras que apuntan as enquisas "son boas", coa posibilidade de obter unha deputada pola Coruña e outra pola provincia de Pontevedra. "É unha demostración de que a xente quere cambio", dixo Laureano Bermejo.

EN MAREA

O director de campaña de En Marea Xoan Hermida valorou "positivamente" a alta participación que tanto en Galicia como en España houbo nestas eleccións xerais e esperou que "as forzas de progreso teñan unha maioría importante".

Así, ante os medios de comunicación, agradeceu o traballo dos membros e simpatizantes de En Marea durante a campaña electoral. "Queremos unha marea de cambio para que as forzas do progreso teñan unha maioría de cambio", subliñou.

Ademais, non quixo falar sobre os datos das enquisas, que non recollen ningún deputado para a organización política. "Esperaremos aos resultados máis definitivos para facer unha valoración", sentenciou.

PP

O secretario xeral do PP de Galicia, Miguel Tellado, decidiu quitar importancia ás primeiras sondaxes a pé de urna porque "prefiren valorar os resultados definitivos" e, tal e como o dixo, "as enquisas, enquisas son". "En calquera caso, sexa cal for o resultado unha vez finalice o escrutinio, todo parece indicar que esta vai ser unha noite longa", vaticinou.

Con estas palabras valorou o número dous dos populares galegos os datos do 'tracking' elaborado por GAD3 para a Forta e difundido pola TVG e pola Radio Galega, segundo o cal o PP caería a entre 69 e 73 deputados no Congreso e obtería oito escanos nas circunscricións galegas, de modo que sería desbancado nesta Comunidade polo PSOE, que obtería entre 9 e 10.

Neste contexto, Tellado lembrou que o seu partido xa dixo durante a campaña "de forma reiterada" que, coa división do voto do centro dereita --entre PP, Cidadáns e Vox--, "finalmente o que podía gañar era Pedro Sánchez". Seguidamente, o secretario xeral do PP galego apelou a que España teña "un Goberno estable", "sólido" e "preparado para afrontar os importantes desafíos" que ten o país.

BNG

O director de campaña do BNG, Rubén Cela, considerou "moi positiva" a participación rexistrada en Galicia, que superou os sete puntos con respecto a 2016 con datos das 18,00 horas. Ademais, destacou que durante a campaña electoral viuse como forza política "á alza", a pesar das "condicións adversas" nas que a formación nacionalista a desenvolveu.

Tras pecharse as urnas, Rubén Cela quixo dar o "máis sincero agradecemento" ao conxunto da militancia, simpatizantes, apoderados e interventores e a todas aquelas persoas que "de forma desinteresada" e nunha situación "adversa" fixeron unha "campaña con intensidade, xenerosidade, ilusión e perseveranza".

Así mesmo, o director de campaña sinalou que foi unha "campaña tremendamente meritoria, en condicións adversas" e nas que puideron comprobar como son unha forza política "á alza, en clara recuperación, e na que moita xente volveu mirar despois de tempo". "Somos optimistas de face ao futuro", sinalou antes de indicar que toca esperar os datos definitivos.