Galicia lidera a perda de autónomos en España, con 2.716 menos que hai un ano

Galicia conta con 2.716 autónomos menos que hai un ano, pasando de ter 213.359 traballadores por conta propia no mes de abril de 2018 a 210.643 autónomos no cuarto mes deste ano, o que significa un descenso do 1,3% e sitúa a Galicia como a comunidade española que lidera a perda de traballadores autónomos en datos interanuais, segundo un informe elaborado pola Asociación de Traballadores Autónomos de Galicia (ATA Galicia).

Por sectores, Galicia perdeu en 12 meses 1.461 autónomos en industria, o que supón un descenso do 9,9% dos traballadores por conta propia neste ámbito. O segundo sector que máis traballadores deste tipo perdeu é comercio, con 1.319 menos (-2,6%). Tamén descenden agricultura (988 e un 3,3%), construción (333 e un 1,2%), transportes (43 e un 0,4%) e hostalaría (284 e 1,3%).

Pola súa banda, actividades profesionais, científicas e técnicas foi o sector que máis creceu en número de autónomos desde abril de 2018, con 368 máis, un 2,5% de suba, seguido de actividades sanitarias, con 257 e un 4,2% máis.

Ademais, no que vai de ano Galicia perdeu ata 643 traballadores por conta propia, o que supón un 0,3% menos, a pesar de que a nivel estatal aumentaron un 0,4%, ata 3,26 millóns deste tipo de traballadores (+12.078 persoas).

"Na nosa comunidade, temos que frear a continua perda de autónomos, xa que non pechamos un ano en positivo desde o 2014, apostando pola consolidación do traballo autónomo, fomentando a substitución xeracional e implementando medidas para parar a sangría de baixas que se producen no Réxime Especial de Traballadores Autónomos (RETA)", subliñou o presidente de ATA Galicia, Rafael Selectos, segundo recolle a asociación nun comunicado.

Con todo, no mes de abril, a Comunidade galega gañou 346 autónomos, o que supón un 0,2% máis en comparación co mes anterior, chegando ata os xa sinalados 210.643 traballadores.

Así, todas as provincias galegas viron aumentar en abril o seu número de traballadores por conta propia. Pontevedra (+0,3%, 171 autónomos máis) lidera o crecemento en termos relativos, seguida da Coruña (0,2%, 29 autónomos máis), Lugo (0,1%, 44 autónomos máis) e Ourense (0,01%, 3 autónomos máis), o que en termos absolutos se traduciu en 346 cotizantes máis ao réxime de autónomos. Segundo xénero, en abril de 2019 gañáronse en Galicia 110 autónomos homes (0,1%) e 236 mulleres autónomas (0,3%).