Galicia é a oitava autonomía con máis falta de 'stock' de medicamentos e

Un informe da Autoridade Independente de Responsabilidade Fiscal (AIReF) sitúa a Galicia como oitava comunidade con máis falta de stock de medicamentos reportado en 2017. Segundo o documento presentado este xoves en relación ao estudo de medicamentos dispensados a través de receita, Galicia reportou en 2017 14.342 faltas de stock de fármacos, mentres que Andalucía --que foi a primeira-- informou de 282.635.

En canto ao número de días, o 45% das faltas reportadas prolongáronse menos de cinco días; o 20%, entre cinco e dez; o 13%, entre 10 e 15; o 11%, entee 15 e 20; e outro 11% máis de 20 días.

O informe da AIReF reflicte que a comunidade autónoma con maior cociente de falta de stock por farmacia é Cantabria (32,1 %), seguida por Andalucía (26%).

A concentración autonómica do gasto explícase, segundo indica a autoridade fiscal no citado informe con datos de 2017, polas características de idade da poboación, a súa distribución no territorio e as diferenzas de tamaño entre comunidades autónomas.

Deste xeito, o 55,1% do gasto farmacéutico repártese entre Andalucía (17,3%, con 1.761 millóns), Cataluña (14%, con 1.421 millóns), Valencia (12,1%, con 1.232 millóns), Madrid (11,7%, con 1.187 millóns) e Galicia (6,8%, con 696 millóns).

Durante o período considerado (2004-2017) o gasto ambulatorio per cápita nas comunidades autónomas reduciuse un 2%. Cataluña (-17,2%), Navarra (-4,1%) e a Comunidade Valenciana (-3,9%) son as tres que máis contribuíron a esta redución. No extremo oposto, o gasto per cápita de Ceuta (14 %) e Melilla (22,7 %), Estremadura (15,9 %), Cantabria (8,2 %) ou Madrid (7,6 %) creceu.

Asturias (0,4%), Galicia (-0,1%), Andalucía (-0,6 %), e Baleares (-0,6 %) mantiveron practicamente inalterado o gasto per cápita en farmacia con taxas de variación pequenas.

A evolución de receitas per cápita de 2004 a 2017 por comunidade autónoma reflicte que dez comunidades están por enriba da media estatal, situándose Galicia na cuarta posición, co 23,73%, fronte á media nacional do 14,33%.

En canto ao dato concreto de 2017, Galicia sitúase en terceiro lugar, con 21,5 receitas per cápita, tras Estremadura (23,2) e Comunidade Valenciana (22,2). A media estatal estaba en 19,6. Segundo destaca a autoridade fiscal, en todas as comunidades autónomas aumentou o número de receitas per cápita.

MELLORAS PRÁCTICAS

A AIReF apunta unha distribución diferente á do número de receitas dado que, actualmente, no gasto por receita a maioría das comunidades autónomas están por enriba da media estatal e só catro delas (Galicia, Illas Canarias, Cataluña e Andalucía) se sitúan por baixo.

Se se ten en conta o tipo, o 62,2% dos medicamentos dispensados con receitaen Galicia eran de marca en 2017 e o 37,8%, xenéricos.

En concreto, Galicia colócase cuarta pola cola en gasto por receita segundo os datos de 2017, con 11,2 euros, o mesmo que a media de España, á que seguen Canarias (10,9), Cataluña (10,4) e Andalucía (10,3).

"O feito de que só este catro comunidades se atopen por baixo da media podería indicar que levan a cabo mellores prácticas de prescrición que o resto de comunidades autónomas", conclúe a autoridade fiscal.