O Hospital Montecelo implanta un sistema de preparación de medicamentos perigosos pioneiro no Sergas

O Hospital Montecelo implantou na práctica clínica real a preparación gravimétrica de medicamentos perigosos que, por primeira vez, se aplica nos centros hospitalarios da rede sanitaria autonómica do Servizo Galego de Saúde (Sergas).

En colaboración coa Compañía Farmacéutica Becton Dickinson púxose en marcha este novo sistema denominado BD CATO, que afecta principalmente a aqueles medicamentos que se utilizan para as preparacións de quimioterapia oncohematolóxica.

Para este proceso técnico, ademais de eliminar o papel de todas as metodoloxías de preparación, dotouse a cada un dos postos de traballo das salas brancas do Servizo de Farmacia con cabinas de fluxo laminar vertical, e incorporáronse un escáner, unha cámara fotográfica, unha balanza de precisión e un computador onde a aplicación electrónica BD CATO guía o persoal do servizo en cada un dos protocolos de preparación de medicamentos perigosos.

CERO ERROS

Un dos aspectos destacados durante esta presentación foi que a posta en marcha deste novo proceso incrementou os estándares de calidade e seguridade neste servizo ata o punto de conseguir o nivel "cero" de erros na preparación de medicamentos.

A clave está en que durante a preparación gravimétrica o erro se detecta en tempo real durante o proceso, de tal maneira que non se permite ao preparador continuar coa metodoloxía de preparación.

Mentres que na preparación volumétrica os erros se detectan cos medicamentos xa preparados, o que implica certa incerteza adicional, ademais da perda económica consecuente ao rexeitamento da preparación realizada e á súa eliminación como residuo perigoso.

Tamén se incrementa a seguridade dos pacientes ao lograr a rastrexabilidade total das preparacións farmacéuticas, identificando de maneira inequívoca, en tempo real e de maneira electrónica, o medicamento preparado e administrado para o paciente concreto ao que se lle prescribiu.