A fiscal xeral do Estado ve "intolerables" as 1.000 mulleres asasinadas desde 2003 por violencia machista
Apela á formación de fiscais e subliña que "o importante son as políticas", tras non acudir Vox a un minuto de silencio por unha morte.
- Reflexións sobre violencia de xénero, a II República ou 'La Fundación', temas do primeiro día da selectividade galega
- A violencia de xénero, tema central da nova edición da Escola de Verán do Ministerio Fiscal
Por E.P. | A CORUÑA | 12/06/2019 | Actualizada ás 14:33
España suma 1.000 mortes por violencia machista desde 2003, co que supera a cifra de asasinatos da banda terrorista ETA, en 854. Así o destacou a fiscal xeral do Estado, María José Segarra, que cualifica de "arrepiantes" e "intolerables" estes datos.
A fiscal participou na inauguración da Escola de Verán do Ministerio Fiscal, no Pazo de Mariñán, en Bergondo, onde destacou que "a violencia exercida sobre a muller é un problema social grave e presente en todo o territorio español".
Así, lembrou algúns dos datos rexistrados, ao resaltar que desde o 1 de xaneiro e ata o 3 de xuño do ano 2019, "22 mulleres foron asasinadas por violencia de xénero", unha delas na provincia de Pontevedra. "Elas son a mostra máis atroz deste tipo de violencia", engade Segarra.
MÁIS DENUNCIAS EN GALICIA
"A existencia dunha vítima en Galicia sitúa estatisticamente a esta autonomía nun valor baixo en comparación con outras: un 4,5% do total", indicou en relación á comunidade galega, onde ao longo do 2018 presentáronse un total de 6.537 denuncias por violencia de xénero, é dicir, incrementáronse nun 1,6% respecto o ano anterior.
Unha cifra "interesante" para a Fiscalía, pois, na súa opinión, "reflicte que as vítimas se mostran con confianza" para denunciar aos seus maltratadores. A fiscal referiuse a os datos do Observatorio contra a Violencia Doméstica e de Xénero do Consello Xeral do Poder Xudicial, que tamén recollen o "incremento de denuncias" nos partidos xudiciais de Lugo, Pontevedra e Ponteareas.
"Dentro das áreas cunha situación grave, é dicir con prevalencia tamén alta pero que diminúe ou aumenta só moderadamente, estaría o partido xudicial de Vigo, cunha taxa de denuncias recente do 7,3%, a máis alta de Galicia. Cambados e O Porriño, partidos situados tamén na provincia de Pontevedra, así como dous partidos da provincia da Coruña (A Coruña e Ribeira) integrarían tamén este grupo", continúa a fiscal.
"Lamentablemente, os efectos da violencia de xénero non terminan nas mulleres", dixo Segarra, que indicou que entre o 1 de xaneiro de 2013, primeiro ano do que se dispón de información, e o 30 de abril de 2019, foron asasinados 28 menores por violencia de xénero, un deles na Coruña a mans do seu pai biolóxico. En canto ao número de orfos menores de 18 anos desde esa data é de 243, 14 no que vai de ano, apunta.
FORMACIÓN
Ante isto, Segarra animou aos operadores xudiciais a traballar para "reverter" estes "arrepiantes" números. Para iso, opinou que "a única maneira é achegar a formación" a todos os fiscais. "Cremos que a mellor forma de estimular é chegar a todos os fiscais e que sexan os propios fiscais os que sexan correas de ligazón destas políticas de formación", engade.
Precisamente, no acto de inauguración, ao que tamén asistiu o fiscal superior de Galicia, Fernando Suanzes, o director xeral de Xustiza, Juan José Martín, destacou "a relevancia da formación e actualización continua entre o persoal que traballa na Fiscalía".
Ao termo da inauguración, a preguntas dos xornalistas sobre a súa opinión respecto da decisión de Vox de non acudir a un minuto de silencio pola morte dunha muller, Segarra considerou que "o importante son as políticas, á marxe de manifestacións que poidan realizar persoas, grupos ou partidos".
