Por Europa Press / Redacción | SANTIAGO DE COMPOSTELA | 17/06/2019 | Actualizada ás 15:05
O secretario xeral do PSdeG, Gonzalo Caballero, instou ao presidente do PPdeG, Alberto Núñez Feijóo, a comparecer publicamente co alcalde de Ourense, Gonzalo Pérez Jácome (DO), e o presidente en funcións da Deputación provincial, o popular Manuel Baltar, para explicar o seu pacto para repartirse estas institucións.
Nunha rolda de prensa celebrada este luns, Gonzalo Caballero criticou que Feijóo "peche o seu ciclo político" cun "exercicio de indignidade política" e de "bochorno" na cidade de Ourense co pacto da súa formación para darlle a alcaldía ao portavoz de Democracia Ourensana, Gonzalo Pérez Jácome.
"Feijóo pecha o seu ciclo político cun intercambio de cromos que traizoa ao electorado de Ourense, porque os votantes do PP non queren a Jácome como alcalde e os votantes de Jácome non queren a Baltar na Deputación", manifestou.
Así mesmo, o líder dos socialistas galegos criticou que o presidente da Xunta non asistise a ningunha toma de posesión dos novos alcaldes o pasado sábado "pola vergoña" que lle dá "o pacto que xerou en Ourense". "Dicíanos que Jácome era letal para a cidade de Ourense e Jácome dicíanos que Baltar era tóxico para a cidade de Ourense", lembrou.
Por iso, emprazou ao tamén presidente da Xunta a "ter valor político" e "explicarlle aos galegos a súa operación para Ourense". "Ten que dar unha rolda de prensa cos seus referentes municipais, Baltar e Jácome, para que o tres expliquen porque aquilo que dicían que era letal para Ourense acabárono aplaudindo este sábado nun exercicio esperpéntico de bochorno político", manifestou.
"MALABARISMOS DO PP"
Neste contexto, Gonzalo Caballero mostrou a súa preocupación polos "malabarismos" do Partido Popular que, como indicou, "fala de que goberne a lista máis votada pero, cando ten que botarse nos brazos de Vox ou nos de Jácome, está disposto a facelo sen responsabilidade nin dignidade", indicou.
"Preocúpanos, ademais, que foi un acordo contra os compromisos que esas forzas tiveron ao longo da campaña e a precampaña, ao longo de todo este tempo político no que Jácome pedía o voto con todo tipo de improperios e descualificacións", sinalou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.