Podemos Galicia confía en que Anova se sume a Galicia en Común de cara ás autonómicas

O secretario xeral de Podemos Galicia, Antón Gómez-Reino, expresou a súa confianza en que a formación nacionalista Anova acabe por sumarse ao proxecto de confluencia Galicia en Común, que o deputado nas Cortes reivindica como a expresión política do "espazo do cambio" que existe na política galega "desde o ano 2015".

Así o indicou, a preguntas dos xornalistas, Antón Gómez-Reino durante unha rolda de prensa celebrada este luns en Santiago na que presentou a xornada que Podemos Galicia organiza este domingo tamén na capital galega. Unha cita á que asistirá o secretario de Organización estatal, Alberto Rodríguez, e que ten por obxectivo "debater" sobre o rumbo político do partido e formar aos inscritos de Podemos Galicia coa vista posta nas eleccións autonómicas previstas para 2020.

Ademais, a xornada tamén servirá para que rendan contas os cinco deputados de Podemos no Parlamento de Galicia (forman parte do Grupo de En Marea) e os parlamentarios nas Cortes, electos pola coalición Galicia en Común, que se integra no Grupo Confederal de Unidas Podemos. Así as cousas, Gómez-Reino pon a vista xa nas eleccións autonómicas para as que, de non producirse un adianto, aínda falta un ano.

"Despois dos resultados do 28 de abril (eleccións xerais), dixemos que se acababa a época e o tempo político de Feijóo", lembrou o deputado en Madrid, que cre en que as eleccións celebradas desde fai catro anos reflicten a existencia dunha "maioría progresista" en Galicia.

Por iso, ante a oportunidade de que se produza "un cambio" no Goberno galego, Podemos Galicia espera que Anova, inmersa nun proceso interno que non concluirá ata o outono, decida finalmente apostar pola súa inclusión no proxecto de Galicia en Común, coalición entre o partido morado e Esquerda Unida para as eleccións xerais de abril.

A formación nacionalista que encabeza Antón Sánchez decidiu entón non presentarse ás eleccións despois de declinar integrarse nunha coalición na que, segundo expresou o seu portavoz nacional, non se daban as condicións para un acordo "entre iguais".

Con todo, Gómez-Reino espera que os nacionalistas completen o seu proceso interno cunha aposta pola confluencia. "Os compañeiros de Anova teñen que participar, como sempre, porque aquí non sobra ninguén", apostilou.

E é que, para o secretario xeral de Podemos Galicia, o verán "é un momento magnífico" para "facer os deberes" e comezar a definir a "ferramenta electoral" de cara ás autonómicas, aínda que puntualizou que "respecta" os "tempos" de cada organización.

Antón Gómez Reino no Congreso