Esquerda Unida denuncia o "incremento da temporalidade" no Sergas e tacha de "absoluto mentireiro" a Feijóo
Eva Solla sinala que é "inadmisible" o "reclamo de recortes" por parte do Ministerio de Sanidade e esixe á Xunta que compre Povisa.
Por Europa Press / Redacción | SANTIAGO DE COMPOSTELA | 06/08/2019 | Actualizada ás 13:26
A coordinadora nacional de Esquerda Unida (EU), Eva Solla, denunciou este martes o "incremento da temporalidade" no persoal do Servizo Galego de Saúde (Sergas), polo que tachou de "absoluto mentireiro" ao presidente da Xunta, Alberto Núñez Feijóo.
Así, nunha rolda de prensa onde valorou a situación da Sanidade galega a partir dos informes que hai dúas semanas o Consello de Contas entregou ao Parlamento de Galicia, Solla criticou os "colapsos" que, segundo ela, "están a vivirse" en hospitais como o de Ferrol e de Pontevedra, así como en Puntos de Atención Continuada (PAC), debido aos "descubertos de persoal".
Con todo, a líder de Esquerda Unida lamentou que "nada está a cambiar na Consellería de Sanidade", a pesar de que os informes de Contas "denuncien o incremento da temporalidade" e "a diminución interanual de 582 efectivos" de persoal, o que, ao seu xuízo, "indica que Feijóo é un "absoluto mentireiro".
"Afirma Contas que o persoal que ocupaba praza en propiedade é o 62% do total. Polo cal, o dato ofrecido no Parlamento de Galicia era mentira. Xa o sabiamos pero agora queda plasmado", sentenciou Solla. Desta maneira, esixiu que se ofreza unha desculpa aos profesionais do Sergas "que foron tratados de forma infantil", así como que se saquen a oferta pública de emprego as prazas necesarias para "dar estabilidade a estes postos estruturais".
Tamén apostilou que o "reclamo de recortes" por parte do Ministerio de Sanidade, Consumo e Benestar Social son "inadmisibles" e pediu a eliminación das taxas de reposición e dos teitos de gasto en Sanidade. "Prevese que a situación non vai mellorar", indicou, xa que, segundo os seus datos, ata 370 médicos xubilaranse nos próximos anos.
POVISA
Sobre o informe que o Consello de Contas presentou de fiscalización do concerto do Sergas co Hospital Povisa de Vigo, Eva Solla sinalou que constata "a redución de camas no hospital novo de Vigo", para así "favorecer o concerto con Povisa".
Tamén criticou que o 16% da concesionaria fose comprada por un fondo de capital risco, polo que solicitou que sexa adquirida polo Goberno galego. "Cremos que cos pagos que se efectuaron por parte da Xunta está amortizada unha parte importante xa do custo que a altura de 2016 era de 69,5 millóns de euros, tendo en canta incluso os beneficios. A estas alturas, ese cálculo pódese volver ofrecer e esixirlle á Xunta que se faga xa con ese centro", indicou.
"Propomos que da forma menos gravosa se adquira o hospital, ben sexa mediante unha expropiación ou mediante unha compra que valore o hospital ao valor que ten agora, coas perdas que dá a empresa, porque o que non podemos é seguir incrementando as contas dunha empresa e unha familia que é multimillonaria", sentenciou.
