Catro persoas feridas, tres delas de gravidade, polo ataque dun can no Bolo, en Ourense
As forzas da orde desprazáronse á zona para capturar o animal, o operativo segue en fase de desenvolvemento e o can xa foi localizado.
Por Europa Press / Redacción | SANTIAGO DE COMPOSTELA | 11/08/2019 | Actualizada ás 17:45
Catro persoas resultaron feridas, tres delas atópanse en situación de gravidade, tras ser atacadas por un can no concello ourensán do Bolo durante a tarde deste domingo.
Fontes de Protección Civil confirmaron a Europa Press que unha persoa tivo que ser trasladada nun helicóptero medicalizado ata o Centro Hospitalario Universitario de Ourense e as outras tres foron desprazadas en ambulancia ata o "hospital máis próximo", o Comarcal do Barco de Valdeorras (Ourense).
Ademais, este organismo explicou que o can é de raza mastín e que pertence á familia das persoas ás que atacou. Por outra banda, a mesma fonte asegurou que os afectados teñen entre 30 e 40 anos.
En canto ás actuacións que se están levando a cabo, a patrulla do Seprona desprazouse ata a zona e xa localizou ao animal, pero aínda non o capturou. Para estes labores os axentes desprazados usan un lazo e tratarán de anestesialo para levalo a unha canceira, segundo manifestou Protección Civil do Bolo.
Tras darse a coñecer o ocorrido, ata o lugar desprazouse unha patrulla da Garda Civil, outra de Protección Civil, outra do Seprona e os servizos sanitarios en dúas ambulancias e un helicóptero.
