Por Europa Press / Redacción | A CORUÑA | 13/08/2019 | Actualizada ás 10:54
O Índice de Prezos ao Consumo (IPC) subiu en xullo en Galicia ata o 0,5%, dúas décimas máis en relación ao mes anterior, segundo os datos publicados este martes polo Instituto Nacional de Estatística (INE).
A nivel estatal, o IPC retrocedeu un 0,6% en xullo en relación ao mes anterior e elevou unha décima a súa taxa interanual, ata o 0,5%, manténdose no entanto nos seus niveis máis baixos en case tres anos.
De acordo cos datos publicados polo INE, o IPC aumenta en 11 comunidades autónomas en xullo respecto de xuño, e mantense nas seis restantes. Os maiores incrementos prodúcense en Illas Baleares, Canarias, Castela-A Mancha, Galicia, Rexión de Murcia e Castela e León, con subidas de dúas décimas.
PRINCIPAIS SUBIDAS
En Galicia, alimentos e bebidas non alcohólicas situaron a súa taxa mensual no 0,1% e interanual no 0,5%; mentres que no caso de bebidas alcohólicas e tabaco rexistraron un descenso do 0,2 e o 0,5%, respectivamente.
No vestido e o calzado, a taxa interanual sitúase no 1%, aínda que destaca o descenso rexistrado no que vai de ano (-16,3%). Na vivenda, a taxa mensual sitúase no 0,6% e a interanual descende un 2,1%. No que vai de ano o descenso é do 3,3%. En canto a lecer e cultura, sobe un 1,4% en termos mensuais, mentres que descende un 0,3% en taxa interanual.
CAUSAS DO REPUNTE
Estatística atribuíu o repunte da taxa interanual do IPC de xullo á evolución dos prezos das froitas, que baixaron menos do que o fixeron en xullo de 2018, e ao encarecemento dos carburantes.
No ámbito estatal, en termos mensuais, o IPC retrocedeu un 0,6% en xullo animado polos descensos de prezos do vestido e o calzado (-12,6%) polas rebaixas de verán, e polos alimentos, que recortaron os seus prezos un 0,3% no mes debido principalmente ao abaratamento das froitas.
Pola contra, o grupo de lecer e cultura elevou os prezos en xullo un 1,6% polo encarecemento dos paquetes turísticos; o grupo de vivenda subiu os seus prezos un 0,7% polo encarecemento da electricidade; o grupo de hoteis incrementou un 0,4% os seus prezos polos servizos de aloxamento, e o do transporte un 0,3% polo encarecemento dos carburantes e, en menor medida, do prezo dos automóbiles.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.