Antón Sánchez levará á Xunta a esixencia de explicacións por depósitos de lodo "sen control" en Sobrado
Pola súa banda, os veciños denunciaron que algúns destes depósitos "non teñen ningún tipo de peche", están "semiocultos pola maleza" e xa ocasionaron "algunha caída" tanto de persoas como de animais.
Por E.P. | SANTIAGO DE COMPOSTELA | 28/08/2019 | Actualizada ás 19:35
O viceportavoz do grupo parlamentario de En Marea, Antón Sánchez, pedirá á Consellería de Medio Ambiente que dea explicacións e información sobre os depósitos de lodo "sen control" que se atopan nos montes da localidade coruñesa de Sobrado dos Monxes.
En concreto, a formación explicou este mércores nun comunicado que Sánchez pedirá datos sobre a orixe e toxicidade das verteduras e as medidas de seguridade esixidas pola Xunta ás empresas responsables, xa que considera que non cumpren cos requisitos "adecuados" para este tipo de instalacións.
Pola súa banda, os veciños denunciaron que algúns destes depósitos "non teñen ningún tipo de peche", están "semiocultos pola maleza" e xa ocasionaron "algunha caída" tanto de persoas como de animais.
Igualmente, o grupo parlamentario sinalou que estas verteduras sobordan por encima das balsas e causan surcos nos terreos, polo que acaban "esparexidos" polos montes lindeiros. Todo isto supón un "risco" que pode acabar no río Mandeo, que é unha zona protexida de Reserva da Biosfera mariña coruñesa e terras do Mandeo.
Ante esta situación, Antón Sánchez presentará unha iniciativa para que a Consellería aclare "a situación" e especifique que tipo de "autorización teñen as empresas" para a almacenaxe destes lodos dos que quere saber "a súa orixe" e o seu nivel de toxicidade.
Para Sánchez existen sospeitas de que estes depósitos se empregaron "durante anos" sen ningún tipo de "control", o que evidencia o "deixamento" de Medio Ambiente, un departamento que está dirixido por "políticos que desprezan a natureza e non se preocupan por facer cumprir a normativa ambiental".
