Andalucía e Galicia acordan mellorar e impulsar a Vía da Prata para o Xacobeo

A Junta de Andalucía e a Xunta de Galicia acordaron levar a cabo accións conxuntas para impulsar a Vía da Prata de cara ao Xacobeo 21, tras un encontro celebrado en Sevilla entre a conselleira de Cultura e Patrimonio Histórico, Patricia del Pozo, e o conselleiro de Cultura e Turismo, Román Rodríguez.

Esta iniciativa insérese dentro dunha batería de medidas para estender o coñecemento desta ruta entre a sociedade, así como melloras na sinalización e o trazado e a promoción de accións culturais conxuntas para a súa promoción, entre outras iniciativas.

Ambos os conselleiros lembraron o "forte vínculo" entre Andalucía e Galicia a través do Camiño de Santiago, xa que esta é a comunidade que máis peregrinos achega á Ruta Xacobea, con preto de 31.000 en 2018, informou a Junta de Andalucía.

Os responsables de Cultura das comunidades nas que comeza e finaliza este itinerario do Camiño de Santiago coincidiron en sinalar a Vía da Prata como unha ruta cun "enorme potencial de crecemento", especialmente ás portas do próximo Ano Santo.

Trátase dunha ruta con destacados elementos arquitectónicos e artísticos, e recursos patrimoniais distinguidos pola Unesco na Lista do Patrimonio Mundial.

DESESTACIONALIZACIÓN E CARACTERÍSTICAS ESPECIAIS

Entre as cualidades da Vía da Prata, os conselleiros destacaron o seu clima favorable nas estacións frías, así como que se converte nunha ruta adecuada para os meses da primavera e o outono, ou as súas condicións óptimas para os peregrinos que realizan a ruta a cabalo e en bicicleta, sumado ás sinerxías cos trazados que percorren Portugal.

Neste sentido, e para pór en valor as particularidades desta ruta, Del Pozo e Rodríguez acordaron medidas para mellorar o estado, a sinalización e os servizos da Vía da Prata en Galicia e Andalucía, para favorecer as peregrinacións en grupo entre colectivos como escolares ou asociacións ecuestres dos dous territorios ou iniciativas para promocionar Sevilla como punto de partida desta ruta e para difundir o Camiño de Santiago en Andalucía.

Exploraron, ademais,a promoción de iniciativas culturais conxuntas sobre este trazado, entre as que figura a creación de guías, materiais audiovisuais ou mesmo unha exposición itinerante.

Os titulares de Cultura destacaron o "clima de entendemento" entre ambas as administracións para impulsar a Vía de Prata, especialmente ante a "oportunidade" que suporá o próximo Xacobeo 21.

Ademais, Román Rodríguez e Patricia del Pozo abriron a porta a manter no futuro novos encontros para a promoción da ruta, nos que tamén participen representantes de todas as administracións implicadas na xestión e difusión do trazado.

Resaltaron que podería converterse nun gran axente dinamizador de zonas rurais, como xa sucede noutros Camiños que atravesan poboacións con problemas demográficos e que reciben un estímulo de desenvolvemento socioeconómico.