Vinte e cinco colexios participarán nun proxecto de compostaxe para reciclar residuos orgánicos
Para escoller os colexios, valorouse que estes centros conten con comedor escolar, teñan un horto, non teñan experiencia en compostaxe e estean dispostos a designar persoal responsable para a posta en marcha do proxecto.
Por E.P. | SANTIAGO DE COMPOSTELA | 08/09/2019 | Actualizada ás 15:53
Un total de 25 escolas galegas participarán nun proxecto de compostaxe o próximo curso para reciclar o 50% dos residuos orgánicos e impulsar a recollida de lixo separado.
Para escoller os colexios, a Consellería de Medio Ambiente valorou que estes centros conten con comedor escolar, teñan un horto, non teñan experiencia en compostaxe e estean dispostos a designar persoal responsable para a posta en marcha do proxecto.
Así o explicou a Xunta este domingo nun comunicado no que informa de que as escolas recibirán "medios materiais necesarios" para a instalación dunha zona para facer compostaxe, así como "a formación precisa para a súa posta en marcha e seguimento".
Neste sentido, formarase ao persoal de cociña e ao profesorado para que poidan "dirixir e supervisar" as actividades e "desenvolvelas durante o primeiro trimestre" do próximo curso, sinala o Goberno autonómico.
O proxecto tamén incluirá a "realización de cursos" sobre compostaxe e reciclaxe para o alumnado así como a "entrega dunha unidade didáctica" sobre esta mesma temática.
