Un premio científico permite a alumnado catalán visitar o 'Festival de Xardíns' de Allariz

Un equipo formado por tres alumnos máis o seu titor, do Instituto catalán Pla de l´Estany (Banyoles), visitou o pasado 10 de setembro o Festival de Xardíns como premio ao seu proxecto Green Light, que consiste en modificar plantas xeneticamente para ser utilizadas como leds ou bombillas.

O proxecto -sostible co medio ambiente- que pretende substituír as farolas, hoxe en día iluminadas por enerxía non renovable, por unha planta lumínica nutrida por un depósito de auga con nutrientes mediante un contagotas por gravidade, participou no reto de xardinería. O desafío científico concreto para estes alumnos/as tiña por título "Para que deben servir e como serán os xardíns e o verde urbano no 2030?" e foi promovido dentro do iFEST polo Gremi de jardineria de Catalunya e Marimurtra.

Estímase que o 90% do crecemento da poboación terá lugar nas cidades nos vindeiros anos. E como o planeta estase a urbanizar moi rapidamente, o papel dos xardíns e das zonas verdes neste novo escenario collerá un papel moi relevante para a comunidade, para a educación, para a saúde, para a sostenibilidade das cidades e para a calidade de vida da poboación. Desta reflexión nacía o reto, acadar melloras de futuro para unha sostenibilidade ambiental e biodiversidade que encaixe nun contexto cada día máis urbanizado.

O iFEST está concebido como a gran festa da tecnoloxía, a ciencia, a innovación e a disrupción, dirixida a aqueles que representan o futuro: estudantes de últimos anos de bacharelato, FP, grados universitarios, mestrías e doutorados co obxectivo de trasladarlles a conciencia de que poden facer grandes cousas nos vindeiros anos, que a sociedade agarda as súas achegas e que teñen o talento para facelas.

No certame deste ano formuláronse 12 retos con máis de 300 equipos, 99 centros de formación e 1500 mozos e mozas. Ao de xardinería inscribíronse 36 equipos dos que  chegaron 6 á final.