Folga indefinida dos traballadores de mantemento dos estaleiros de Navantia na Ría de Ferrol
Un laudo arbitral ditado este domingo establece que non son necesarios decretar servizos mínimos.
Por Europa Press / Redacción | SANTIAGO DE COMPOSTELA | 23/09/2019 | Actualizada ás 11:41
Os traballadores da Unión Temporal de Empresas (UTE) Tecman-Electrorayma, auxiliar encargada do servizo de mantemento nos dous estaleiros que a empresa naval pública Navantia ten na Ría de Ferrol, e de Indasa, do mantemento das cabinas de pintura, iniciaron este luns, 23 de setembro, unha folga de carácter indefinido para reclamar que os nove e seis traballadores despedidos, respectivamente, sexan readmitidos.
Sobre as 5,30 horas montáronse piquetes ás portas dos estaleiros de Ferrol e Fene (A Coruña), onde nas instalacións de Perlío "algúns responsables tanto das auxiliares como de Navantia acenderon algunhas cabinas, o que vai motivar unha reunión entre o comité de empresa e a dirección".
Así o asegurou Vicente Vidal, representante de CIG-Industria na comarca de Ferrol nunha asemblea desenvolvida desde as 10.00 horas deste luns, na que tamén participaron delegados doutras compañías e do comité de empresa de Navantia Ferrol, acción esta que "imos denunciar e non imos permitir".
SERVIZOS MÍNIMOS
Por outra banda, o laudo arbitral ditado na tarde deste domingo, 22 de setembro, pola presidenta do Consello Galego de Relacións Laborais (CGRL), Verónica Martínez Barbeiro, establece a negativa de aplicar servizos mínimos nesta folga.
A parte empresarial, formada por dúas empresas asentadas en Narón (A Coruña), solicitara que se decretasen servizos mínimos para poder atender algunhas das encomendas asignadas, pero a mediadora estima que estes non son necesarios.
Segundo o laudo arbitral, ao que tivo acceso Europa Press, "non procede a fixación de servizo de mantemento mínimos ou seguridade, xa que non existe fundamento constitucional algún que permita limitar, para a dita convocatoria, o dereito fundamental da folga".
A esta conclusión chegouse despois de que a parte sindical e social, conxuntamente co árbitro, se reuniran este domingo desde as 12,30 horas e durante máis de dúas horas na sede social da UTE, no polígono industrial das Lagoas, en Narón.
