Piden a comparecencia de Feijóo ante o peche de Endesa nas Pontes

O Grupo Común da Esquerda, o BNG e o Grupo Mixto pedirán este martes na xunta de portavoces do Parlamento de Galicia a comparecencia do presidente da Xunta, Alberto Núñez Feijóo, ante o anuncio de Endesa de acelerar o peche dos seus centrais de carbón nas Pontes (A Coruña).

Pola súa banda, o PSdeG, que avogou por unha "grande alianza" para a reindustrialziación de Galicia e acusou ao máximo mandatario autonómico de utilizar este asunto para confrontar, preferiu esperar á xunta de portavoces do martes para explicitar a súa postura.

O secretario xeral do PSdeG, Gonzalo Caballero, censurou que Feijóo prefira "xogar á confrontación co goberno socialista" en España sen "asumir as responsabilidades que lle corresponden como presidente".

E é que, conforme lembrou, a Xunta ten "plenas competencias" industriais polo que "ten o deber de responsabilizarse e dar solucións aos problemas industriais do país". "E de facelo, buscando grandes acordos que poñan o interese industrial de Galicia por enriba da confrontación electoral", manifestou o socialista.

Nesta liña, considerou "importante que todas as institucións públicas fagan esforzo de cooperación para que a empresa Endesa manteña a actividade enerxética na central das Pontes" con base en "fontes enerxéticas distintas que permitan manter o emprego. "É necesario que a empresa faga un exercicio de responsabilidade social corporativa e que, ademais de manter o emprego consiga readaptar a súa produción", indicou.

Ademais, asegurou que o PSdeG está en "contacto continúo" co Goberno central e lembrou que o propio presidente en funcións, Pedro Sánchez, mostrou o pasado sábado a súa "sensibilidade e preocupación" por "manter o emprego" alí onde hai procesos de reconversión.

GRUPO COMÚN DA ESQUERDA

Pola súa banda, o Grupo Común da Esquerda, que anunciou a petición de comparecencia do presidente xunto a outras forzas, trasladou o seu apoio ás 700 familias "que dependen do futuro" da central de Endesa nas Pontes, cuxo peche, anunciado o pasado venres, era "unha evidencia" ante a que "non se podía pechar os ollos". "Agora vimos que o desenlace é moito máis rápido", asegurou a deputada Luca Chao.

Sobre esta cuestión, Chao lamentou a "falta de previsión" dos gobernos central e autonómico. Así, cargou contra un Executivo central que "non fixo nada para unha transición enerxética xusta" e contra o Goberno galego de Alberto Núñez Feijóo que, segundo Chao, carece de "ningún tipo de política industrial de emprego".

"O Goberno galego ignorou esta ameaza certa, non reaccionou, e mesmo o PP votou en contra de propostas que pedían traballar nun plan de emprego para a comarca, vinculado coas enerxías renovables que garantise os postos de traballo", incidiu a tamén membro de Podemos Galicia.

POSTURA DO BNG

A portavoz nacional do BNG, Ana Pontón, tamén esixiu que a comparecencia de Feijóo na Cámara para que de explicacións sobre "que vai facer para garantir unha transición xusta" ante unha crise industrial" na que, na súa opinión, Endesa é "só a punta do iceberg".

Pontón advertiu de que o peche da central pon en risco o futuro do municipio e da comarca e urxiu abordar "de forma rigorosa a transición ecolóxica e a descarbonización" pero sobre todo, "como e cando" se debe producir o proceso sen esquecer que o "máis importante" é ofrecer unha alternativa antes da paralización de central.

Así, recalcou que a prioridade é a "produción e o emprego" e, despois, o proceso de peche. Conforme indicou, Galicia atravesa unha "grave crise industrial" que empezou en Ferrol coa reconversión naval, na que se comprobaron os "plans pantasma" que deixaron unha "comarca deprimida".

Pola súa banda, fontes do Grupo Mixto confirmaron que os de Luís Villares apoiarán este martes a petición para que o presidente da Xunta, Alberto Núñez Feijóo, acuda á Cámara a dar contas sobre este asunto.

"A XUNTA CUMPRIU CO SEU DEBER"

Por último, o portavoz parlamentario do PPdeG, Pedro Puy, acusou á oposición de tratar de "enmarañar o debate" e defendeu que a Xunta "cumpriu co seu deber", mentres que é o Goberno de Pedro Sánchez o que "obriga a pechar unha fábrica" e a perder "un investimento de máis de 200 millóns" para adaptarse ás emisións de CO2 que determina a UE.

"Marca uns prazos adiantados e obriga a anticipar uns obxectivos ambientais da UE de forma unilateral e sen falalo con Galicia", sinalou Puy, quen remarcou, ademais, que "exporta" emprego a outros países dos que se terá que "importar" enerxía contaminante, polo que a decisión tampouco favorece a loita a favor do medio ambiente, que é "global".

O portavoz parlamentario popular incidiu en que a responsabilidade cae "ao lado do Goberno de España", ao que acusou de manter "o silencio" e obviar todas as peticións de "diálogo" da Xunta. "A oposición pode dicir o que queira, que a Xunta cumpriu co seu deber", sentenciou, antes de engadir que seguirá colocando propostas sobre a mesa e aberta a falar.

Preguntado acerca de se o Parlamento sería un bo foro, como pide a oposición, para que Feijóo explique estas novas propostas, Puy respondeu que o Pazo do Hórreo acaba de albergar o Debate sobre o Estado da Autonomía, onde compareceu o presidente e abordáronse propostas de política industrial. 

En todo caso e, aínda que insistiu en que a oposición "pide algo que xa foi aprobado e debatido", non pechou do todo a porta a que haxa "algunha comparecencia" no pleno da semana próxima sobre este asunto (sinalou que a decisión será do Goberno autonómico e coñecerase na Xunta de Portavoces deste martes). E en todo caso, remarcou que "seguro" que se tratarán "iniciativas" respecto diso.