UU.AA. chama aos produtores a reclamar o diñeiro subtraído por pactar o prezo do leite
O sindicato lembra a sanción da CNMC en 2015 e calcula que o montante podería ascender a 315 millóns en Galicia
- Presentan en Galicia a iniciativa que fixou un prezo mínimo do leite para os produtores franceses
- UU.AA. lamenta que na "lexislatura do rural" anunciada por Feijóo "subiron os impostos"
Por E.P. | SANTIAGO DE COMPOSTELA | 01/10/2019 | Actualizada ás 14:36
Unións Agrarias iniciará unha campaña de charlas en diferentes zonas para informar os gandeiros dos seus dereitos pola sanción á industria, imposta en 2015 pola Comisión Nacional de Mercados e Competencia, por pactar os prezos do leite e repartirse o mercado de produtores.
O obxectivo do sindicato é que os gandeiros coñezan as vías dispoñibles para poder recuperar o diferencial que perderon debido a ese pacto de prezos á baixa, que calculan nunha media de 3 céntimos por litro e que en total podería ascender a uns 315 millóns de euros en Galicia, segundo as estimacións da organización agraria.
En rolda de prensa, o responsable de servizos de UU.AA., Óscar Pose, lembrou que esta sanción, que ascendía a case 90 millóns de euros, saíu á luz pública de novo este ano e aínda é obxecto de recurso. A pesar diso, insistiu en que os produtores "por fin" teñen a posibilidade de reclamar á industria "o diñeiro subtraído", que supoñen "cantidades moi importantes" para os afectados.
É por iso que desde a organización agraria porán a disposición dos gandeiros os seus servizos xurídicos para presentar as reclamacións pertinentes e emprenderán unha serie de charlas nas zonas produtoras para explicar a situación actual.
Pose enmarcou este proceso nun contexto no que persisten as dificultades para os produtores, co peche 500 explotacións lácteas cada ano.
A pesar da "estabilidade" de prezos que traslada a Consellería de Medio Rural, o sindicalista lembrou que se sitúan entre "os máis baixos" (entre 2 e 2,5 céntimos por baixo da media nacional) e os produtores "non buscan simplemente subsistir, senón sacarlle rendemento ao traballo" realizado.
"SEN CAPACIDADE NEGOCIADORA"
Ao mesmo tempo, a industria está a impor "o mesmo modelo de contrato" ás explotacións "con cláusulas abusivas", dun ano de duración, e os produtores atópanse "sen capacidade negociadora" para garantir, explicou.
Pose comparou esta situación co recente acordo entre produtores franceses e Lactalis a través dun mediador, unha figura "fundamental" para garantir unha "verdadeira negociación en pé de igualdade" coa industria e unha reclamación desde o sector en Galicia.
Xunto ao peche de explotacións e ao baixo prezo do leite, o sindicalista tamén reiterou o problema existente coa "falta de pagamentos" dos primeiros compradores que, a un mes ou dous meses, decláranse en concurso e impide aos produtores o cobro das entregas.
Unións Agrarias reclamou, neste sentido, que se reúna a Mesa do Leite e que Medio Rural abandone a "pasividade absoluta" ante esta situación, para poder asistir a unha "negociación real" para paliar esta situación.
