Os orzamentos da Xunta para 2020 impulsan o apoio ao sistema universitario segundo a conselleira de Educación
Carmen Pomar fixo estas declaracións desde o Centro de Investigacións Científicas Avanzadas para coñecer o proxecto da investigadora Elena Pazo.
Por E.P. | A CORUÑA | 18/10/2019 | Actualizada ás 18:50
A conselleira de Educación, Universidade e Formación Profesional, Carmen Pomar, subliñou que os orzamentos da Xunta para 2020 impulsan o apoio ao sistema universitario galego e o reforzo das estruturas de investigación universitaria.
Así o destacou durante unha visita ao Centro de Investigacións Científicas Avanzadas e o Instituto de Investigación Biomédica CICA-INIBIC para coñecer o proxecto de investigación que a científica galega Elena Pazo, que obtivo unha bolsa Starting Grant dotada con 1,5 millóns, vai desenvolver nesta agrupación estratéxica, vinculada á UDC.
A titular de Educación destacou o "marcado carácter social" dunhas contas que ofrecen, segundo expuxo, un escenario de estabilidade e que permiten "seguir apostando polo sistema universitario de Galicia e polos grupos de investigación".
En concreto, para o próximo ano haberá unha partida de 441 millóns de euros para o financiamento do SUG, o que representa un 2,63% máis que o actual e 64 millóns destinados exclusivamente á investigación universitaria, o que supón un crecemento do 4%, segundo a Consellería.
