Por Galicia Confidencial | SANTIAGO DE COMPOSTELA | 21/10/2019 | Actualizada ás 15:04
O grupo de En Marea reclama que o Parlamento de Galicia declare oficial a linguaxe de signos e que o seu uso se incorpore a todas as actividades parlamentarias, segundo recolle un texto lexislativo que propón modificar o regulamento da Cámara para facilitar a inclusión das persoas con discapacidade.
Esta proposta, presentada este luns en rolda de prensa polo portavoz de En Marea, Luís Villares, e a deputada Paula Vázquez Verao, será debatida no pleno que comeza o martes na Cámara autonómica.
Ademais de elevar a rango oficial a linguaxe de signos, En Marea tamén propón que a Presidencia do Parlamento elimine as barreiras arquitectónicas que existen no Pazo do Hórreo, sede do Lexislativo galego.
"A inclusión non debe ser o excepcional, debe ser a norma", indicou Verao, que se preguntou "que ocorrería" se unha persona en cadeira de rodas lograse unha acta de deputado, pois o edificio non está adaptado e presenta "numerosas" barreiras, como escaleiras para acceder ás salas ou ao hemiciclo e dobres portas.
Ademais, tamén solicitan que a comisión de discapacidade teña carácter permanente para que "a casa do pobo sexa máis inclusiva". "Parécenos de recibo que materias como a igualdade, a discapacidade ou o emprego nun país precarizado sexan permanentes nesta Cámara", subliñou.
"Estamos en política para ampliar dereitos e a primeira ampliación de dereitos de dereitos necesaria é a igualdade de oportunidades", destacou Luís Villares, que incidiu na "necesidade" de que "a igualdade de dereitos" estea blindada no regulamento da Cámara.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.