O Concello de Pontevedra limita a velocidade máxima a 10 km/h en rúas con plataforma única

O Concello de Pontevedra implantará a velocidade máxima para todo tipo de vehículos, incluídos patíns e bicicletas, a 10 quilómetros por hora, nas denominadas "zonas de convivencia", é dicir, aquelas rúas con plataforma única e nas que conviven no mesmo espazo peóns e tráfico rodado.

Así o anunciou este martes o concelleiro de Mobilidade, Demetrio Gómez, que informou de que está previsto que as sinais se coloquen nesta noite e tamén na do mércores ao xoves na "améndoa central" que circunda o centro histórico.

Deste xeito, ademais da zona vella, esta medida afectará a todas as súas rúas perimetrales: Arcebispo Malvar, Praza de España, Michelena, Riestra, Gutiérrez Mellado, Praza da Peregrina e o primeiro tramo de Benito Corbal. Nesta primeira quenda tamén se incluirán as zonas reformadas do Camiño de Santiago: Virxe do Camiño e Gorgullón.

En todas elas, ademais, mantense o horario limitado de carga e descarga, fixado entre as 8,00 e as 12,00 horas e as 16,00 e as 18,00 horas.

Demetrio Gómez explicou que, ao tratarse dunha medida pioneira, teñen que "estudar o seu funcionamento" e, segundo cal sexa o resultado, decidirase se se implanta noutras zonas da cidade con plataforma única, pero que non son espazos tan compactos como o centro histórico. A modo de exemplo, o concelleiro aludiu ao ámbito de Ferreiros, Rúa Nova de Arriba e de Abaixo ou Concepción Arenal.

Desde está noite cámbiase toda a sinalización do centro histórico de Pontevedra para que quede limitado a 10 quilómetros por hora co obxectivo de aumentar a sensación de seguridade que, subliñou o edil, supón "algo fundamental para a autonomía dos nenos", ou para que as persoas con mobilidade comprometida, para que teñan "a sensación de que son espazos seguros".