Máis de 2000 persoas en toda Galicia pasan á última fase das oposicións de educación

Un total de 2.123 persoas superaron a primeira fase do proceso de oposicións de educación para as 1.664 prazas de 50 especialidades que convocou a Xunta este ano. Así, á oposición presentáronse 17.611 aspirantes sobre uns 20.500 inscritos, segundo avanzou este sábado o conselleiro de Educación, Ciencia, Universidades e Formación Profesional, Román Rodríguez.

As persoas que superaron a primeira parte, pasarán agora á segunda fase na que defenderán a programación e exporán unha unidade didáctica --para os profesores de secundaria-- e un tema --para os que cambian de especialidade--. O titular da carteira educativa galega desexou sorte aos convocados nesta "recta final" que finalizará o 20 de xullo. Ao mesmo tempo, agradeceu o traballo que desenvolven os integrantes dos 183 tribunais que xulgan e supervisan as probas.

Román Rodríguez explicou que no proceso de oposicións de educación deste ano foron admitidas máis de 20.500 persoas para un total de 1.664 prazas de persoal funcionario. A maior parte, un total de 1.424 son de ingreso libre, 10 para o acceso ao corpo de inspectores de educación e outras 230 para que profesores que xa forman parte do sistema poidan acceder a un posto como profesores de Secundaria.

Por corpos, no de profesores hai 426 prazas en oito especialidades e no de profesores de ensino secundario, 918 en 33 especialidades. Así mesmo, hai 80 prazas en oito especialidades no corpo de profesores especialistas en sectores singulares da FP e 10 para inspectores de educación. En canto á promoción interna, hai 230 prazas en 32 especialidades.

O Conselleiro De Educación, Ciencia, Universidades E FP, Román Rodríguez, visita as sedes das oposicións de educaci | Fonte: XUNTA