Por E.P. | Narón | 28/10/2019 | Actualizada ás 20:22
O BNG incidiu en que as eleccións xerais do próximo 10 de novembro "non van do futuro de Pedro Sánchez ou Pablo Casado" senón que "van dos 6.000 empregos en xogo" no sector industrial de Galicia ou de "subir as pensións que son as máis baixas do Estado" e "acabar coa estafa da AP9".
A portavoz nacional do Bloque, Ana Pontón, pronunciou estas palabras durante a súa intervención nun mitin celebrado este luns en Narón (A Coruña) onde arroupou ao cabeza de lista ao Congreso pola provincia coruñesa, Néstor Rego.
Pontón apelou a concentrar no BNG o voto "en clave de país" para así "acabar co ninguneo e o desprezo" cara a Galicia por parte das forzas estatais.
"É esta comarca (Ferrolterra) sabedes ben dos problemas da deslocalización, da precariedade dun mercado de traballo que as contrarreformas laborais de PP e PSOE non fixeron máis que agravar, pero aí seguen", incidiu a líder nacionalista.
Pola súa banda, Rego lanzou unha mensaxe ás persoas que "votaron outras forzas galegas ou da esquerda española e que agora senten defraudadas porque comprobaron que, despois de chamar ao voto útil, foron completamente inútiles para Galicia".
"Están a tempo de conseguir que o BNG volva ter presenza no Congreso e con iso ter a garantía de responsabilidade e compromiso co país", aseverou o candidato.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.