O Goberno galego rexeita o reparto de menores migrantes sen consenso nin recursos

A Xunta de Galicia confirmou que a conselleira de Política Social, Fabiola García, non acudirá este xoves á Conferencia Sectorial sobre menores migrantes ao considerar que foi “convocada de forma ilegal” e cunha orde do día previamente rexeitada. O departamento autonómico asegura que, malia participar habitualmente nestas reunións, Galicia non pode asistir a unha cita que incumpre os procedementos establecidos.

A Xunta reiterou que o sistema autonómico de protección de menores está saturado cunha ocupación do 108%, polo que rexeita asumir a acollida de 317 menores máis. Ademais, rexeita o modelo do Goberno central por entender que promove a creación de macrocentros, afastados dun enfoque integrador e contrario ao interese superior dos menores.

O Goberno galego acusa ao Executivo de Pedro Sánchez de convocar a conferencia para “impor” decisións sen diálogo coas comunidades e de buscar “enfrontar aos territorios” con criterios arbitrarios. Tamén alerta dun risco real de colapso dos sistemas de protección se se forza a chegada de máis menores sen planificación nin recursos, o que obrigaría a abrir centros masificados sen garantías.

Finalmente, a Xunta critica que o Executivo central fomente un “efecto chamada” ao anunciar repartos, sinalando que a chegada de menores aumentou un 700% nos últimos tres anos. Por iso, esixe que o Goberno asuma directamente a atención nas situacións de emerxencia e cumpra coas súas obrigas, tal como recollía o acordo de setembro de 2024 e a Declaración de Asturias.