Por E.P. | SANTIAGO DE COMPOSTELA | 30/10/2019 | Actualizada ás 12:43
A cabeza de lista ao Congreso por Pontevedra de En Común, Yolanda Díaz, alertou de que un goberno no que o Partido Socialista non conte con Unidas Podemos sería un executivo "virado á dereita" e cun Pedro Sánchez "susanizado", en referencia á expresidenta andaluza Susana Díaz.
Así o indicou a ferrolá este mércores nun almorzo informativo celebrado en Santiago xunto co resto de cabezas de lista á Cámara alta da coalición de Podemos Galicia e Esquerda Unida --Antón Gómez-Reino (A Coruña), Vanesa Somoza (Lugo) e David Bruzos (Ourense)--.
A pouco máis de 24 horas para o inicio da campaña, En Común confía en manter os resultados obtidos nas eleccións de abril (dous deputados polas provincias atlánticas) e, mesmo, melloralos coa "ruptura do bipartidismo" en Lugo e Ourense e a posilibidad de alcanzar o segundo escano pola Coruña e Pontevedra.
En palabras de Gómez-Reino, que apela a afrontar as enquisas con "precaución", estes estudos reflicten a "tendencia" de que o espazo "está consolidado" e en liña ascedente, polo que chama "á mobilización da cidadanía progresista e de esquerdas que quere que haxa un goberno de esquerdas".
Para iso, avisan que a presenza de Unidas Podemos no Execuctivo será "fundamental". "Se non está Unidas Podemos no goberno non vai haber cambios, senón que haberá un Pedro Sánchez virado á dereita e susanizado", incidiu Yolanda Díaz.
A candidata por Pontevedra subliñou que nesta cita coas urnas os cidadáns "merecen certezas" e que cada forza política "resolva" de antemán "a dúbida" de por que fórmula apostan a partir do 10 de novembro para garantir a gobernabilidade. "Nós témolo claro: un goberno de esquerdas cun programa de esquerdas", apostilou.
"Chegou o tempo das certezas e de votar con claridade", aseverou Díaz, que centrou as súas críticas no Partido Socialista, formación que, ao seu xuízo, representa "un voto inútil" para a defensa de cuestións como o mercado laboral --"non vai derrogar a reforma laboral"--, as pensións --"queren impor a mochila austríaca"-- e a fiscalidade --"a carga seguirá sendo para os traballadores" mentres o número de ricos "se multiplicou por 500 nos anos da crise"--.
CRÍTICAS Á CRTVG
Así mesmo, En Común Unidas Podemos criticou este mércores o plan de cobertura informativa da CRTVG para a campaña do 10 de novembro, especialmente, pola supresión das entrevistas aos candidatos e a localización en horario matinal (10,00 horas) do único debate que emitirá a radio e televisión pública de Galicia.
"Facelo desta forma é furtar á cidadanía o dereito a recibir unha información veraz e completa ante unha cita tan importante como esta", sinalou Gómez-Reino, que lamentou que a CRTVG "desatende o que debería ser unha cobertura lóxica e democrática" das eleccións por parte dun servizo público.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.