Por E.P. | Ourense | 31/10/2019 | Actualizada ás 15:58
A Xunta de Goberno Local do Concello de Ourense deu conta dunha nova sentenza ditada polo Xulgado Contencioso-Administrativo que tomba a expropiación dos terreos das Burgas. A anulación do proceso de expropiación é "consecuencia da anulación do Plan Especial de protección do BIC das Burgas", explicou este xoves o portavoz da Xunta de Goberno, Miguel Caride.
Neste contexto, Caride sinalou que en canto cheguen todas as sentenzas que anulan a expropiación por este motivo, "o Concello debe porse a traballar intensamente para volver redactar o Plan Especial e poder pór en marcha os proxectos de futuro para a zona".
Uns proxectos de futuro que pasan, entre outros, polos programas termais e que deixan no aire actuacións como o tan ansiado hotel-balneario na contorna do antigo cárcere de Progreso.
Miguel Caride subliñou que o Goberno ten "especial interese" en abordar o tema porque afecta unha zona "clave" para a cidade dado que "aí naceu Ourense".
Por este motivo, a título persoal Caride dixo entender que "unha vez redactado e aprobado o Plan Especial para o BIC das Burgas, habería que ver a incorporación desta ordenación urbanística dentro do novo PXOM e cales son as posibilidades de desenvolvemento, xa sexa desde a iniciativa pública ou privada".
PERSPECTIVAS PXOM
A dous meses para que remate 2019, as perspectivas para a PXOM mantéñense sen cambios. Caride sinalou que continúan mantendo reunións de traballo "máis técnico que político" coa concelleira de Urbanismo e o seu equipo.
"A intención é darlle unha saída ao asunto partindo dun concepto claro de documento como algo absolutamente necesario e imprescindible para a cidade", apuntou Caride.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.