O BNG pide o voto dos mozos e mozas preocupados polo cambio climático e que "non queren Trumps nin Bolsonaros"
Ana Pontón arroupou á cabeza de lista do BNG ao Congreso por Pontevedra, Carme da Silva, nun encontro con colectivos relacionados coa emerxencia climática desrrollado na praia de Lourido fronte á pasteira de Ence.
Por E.P. | SANTIAGO DE COMPOSTELA | 06/11/2019 | Actualizada ás 17:59
O Bloque Nacionalista Galego (BNG) pediu o voto dos mozos galegos precoupados polo cambio climático e que, segundo a líder frontista, Ana Pontón, "non queren en Galicia nin Trumps, nin Bolsonaros nin curmáns de Rajoy".
Así o manifestou nun acto celebrado este mércores na localidade pontevedresa de Poio, onde os nacionalistas trasladaron as súas propostas nesta materia ás organizacións convocantes das mobilizacións do Clima en Pontevedra.
Ana Pontón arroupou á cabeza de lista do BNG ao Congreso por Pontevedra, Carme da Silva, nun encontro con colectivos relacionados coa emerxencia climática desenvolvido na praia de Lourido fronte á pasteira de Ence, onde tamén estiveron os alcaldes de Pontevedra, Miguel Ánxo Fernández Lores, e Poio, Luciano Sobral.
En declaracións aos medios, a líder frontista instou a esa mocidade preocupada pola ecoloxía a que opte polo BNG o vindeiro domingo 10 de novembro porque é, dixo, "a única forza" que "estivo desde o principio" pedindo a saída da fábrica de Ence da ría e tamén "a única que levou a Bruxelas o saneamento integral das rías e defende unha moratoria contra o eucalipto".
Pontón animou a apostar polo Bloque aos mozos que defenden un futuro sustentable "e que non quere en Galicia nin Trumps, nin Bolsonaros, nin Salvinis, nin curmáns de Rajoy" aos que se referiu como "apóstolos do negacionismo da emerxencia climática".
PP: "FÁBRICA DE CAMBIO CLIMÁTICO"
A portavoz nacional do Bloque tamén acusou ao Partido Popular de desenvolver en Galicia políticas "que son unha auténtica fábrica de cambio climático". Pola súa banda, a cabeza de lista por Pontevedra, Carme da Silva, puxo sobre a mesa a experiencia acumulada polo Concello de Pontevedra e asegurou que a emerxencia climática será unha prioridade do BNG no Congreso.
Segundo Carme da Silva, se o BNG logra representación no Congreso, defenderá un programa político no que figuran como prioridades revogar a "prórroga ilegal" de ENCE para "sacala da ría e proceder a súa recuperación integral". Tamén se comprometeu a propor en Madrid que a Lei estatal de Patrimonio Natural e da Biodiversidade inclúa o eucalipto como especie invasora, limitando o seu cultivo e plantación.
Ademais, reclamará a rexeneración integral das rías galegas, apostará por un cambio de paradigma cara a un modelo económico sen enerxía fósiles a medio a longo prazo e defenderá potenciar unha economía circular con medidas como a compostaxe ou a redución da contaminación por tráfico rodado "como xa se fai en Pontevedra".
Por último, Ana Pontón tamén indicou que o BNG defenderá no Congreso "prohibir por lei as portas xiratorias", para "evitar que as maiores empresas contaminantes, como as eléctricas, senten no Consello de ministros por persoas interpostas utilizando a ex cargos políticos como 'lobbistas' de luxo a favor dos seus intereses".
