Por Europa Press / Redacción | SANTIAGO DE COMPOSTELA | 08/11/2019 | Actualizada ás 16:24
O cabeza de cartel pola Coruña ao Congreso de En Común-Unidas Podemos, Antón Gómez-Reino, manifestou que a súa formación buscará que "un galego ou galega" dirixa as carteiras de Pesca e Agricultura nun hipotético futuro goberno.
"Todo o mundo entendería que, en España, fosen galegos e galegas quen tivesen as políticas públicas en pesca ou a voz fundamental no agro ou o sector lácteo", asegurou o candidato coruñés, que enxalzou o sector primario porque "asenta poboación e xera economía baseada na sustentabilidade".
Ademais, propuxo unha rebaixa no IVE aos produtos pesqueiros como vía para axudar o sector da pesca e para, ademais, fomentar hábitos alimentacios saudables.
Lamentou que o sector da pesca "leve tempo case que autorregulándose para coidar as pesqueiras e ser sustentables" ante a "falta de decisión política" e a ausencia dun goberno "que defenda a súa postura en Europa", o que provoca que se atopen con "caladoiros pechados de forma ilóxica" ou "marcos normativos que dificultan a súa actividade".
Por último, apelou a que o domingo, xornada de eleccións, se produza "unha mobilización histórica do voto da esquerda" a pesar de que é consciente de que "moita xente progresista e de esquerda neste país se sente agora defraudada".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.