Por Europa Press / Redacción | SANTIAGO DE COMPOSTELA | 18/11/2019 | Actualizada ás 19:26
Os sepulcros do Panteón Real, as esculturas de Praterías ou a Porta Santa da Catedral de Santiago serán algunhas das 75 pezas artísticas que aparecerán recollidas con tecnoloxía 3D nunha páxina web e poderán ser reproducidas con exactitude grazas ás técnicas de dixitalización.
Trátase dun proxecto liderado pola Fundación Catedral e ideado polo Museo da basílica compostelá que ademais se atopa enmarcado na liña de axudas 'O teu Xacobeo', promovida pola Xunta de Galicia de cara á celebración do Ano Santo 2021.
En concreto, os traballos de fotografado e escaneado comezaron con varios relicarios e os sepulcros do Panteón Real e continuarán máis adiante con algunhas pezas expostas no Museo, coas esculturas da fachada de Praterías e a Porta Santa.
Segundo a Fundación Catedral, trátase dunha idea na que "se traballa desde hai tempo" debido á "importancia de documentar as pezas e a grande oportunidade que ofrece o 3D á hora de estudalas". Non en balde, tamén podería ser útil "para futuras restauracións".
E é que a pesar de que a fotografía convencional exerceu e exerce ata agora "un papel fundamental" para a divulgación no mundo patrimonial, coa chegada dos modelos tridimensionais e novos aparellos de captura de imaxe "amplíanse as funcións que achega a fotografía e ábrese todo un abano de novas aplicacións", tal e como consta na descrición do proxecto.
REPRODUCIÓNS "PERFECTAS E EXACTAS"
Ademais, a dixitalización ofrece a posibilidade "de imprimir ou fresar o modelo nun material sólido" e en varios tamaños para usos diversos, o que incluiría a elaboración de, por exemplo, pequenas reproducións da Porta Santa.
A obtención dunha réplica dixital "perfecta e exacta" pode resultar útil tamén para fins editoriais e pedagóxicos en congresos e exposicións. "É interesante apuntar a posibilidade de elaborar vídeos desas pezas partindo dos modelos 3D resaltando encadres, ángulos, iluminación e cadencias que interesen", destacan.
Así mesmo, recoñécese que un factor bastante importante deste modelo de captura é a súa "nula agresividade" na manipulación do patrimonio, xa que non é necesario o contacto físico coas pezas durante o proceso de dixitalización. Para iso, utilízanse dúas técnicas complementarias: a fotogrametría e o escaneado láser.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.