Nace a guía básica da FP Dual de Galicia con directrices para alumnos, centros e empresas

O Palacio de Congresos e Exposicións de Galicia, en Santiago de Compostela, acolleu este martes a primeira xornada técnica sobre a FP Dual na Comunidade, na que se presentou unha guía básica que inclúe as "directrices" para que centros, alumnos e empresarios coñezan as súas "atribucións" á hora de participar nesta modalidade formativa.

Así o explicou a conselleira de Educación, Universidade e Formación Profesional, Carmen Pomar, durante a inauguración deste evento que significou xuntar por primeira vez a todos os axentes implicados no desenvolvemento da Dual. Nas súas palabras, a guía presentada este martes servirá tamén como "unha ferramenta" para que os interesados nesta oferta formativa, que combina teoría e práctica, "comprendan as súas potencialidades".

Neste contexto, a responsable de Educación do Goberno galego erixiu á FP Dual nun modelo "innovador" de Galicia que é "pioneiro no Estado". E é que, desde a súa posta en marcha no ano 2012, xurdiron 73 destes proxectos, con 1.350 alumnos matriculados e case 300 empresas participantes.

Segundo Carmen Pomar, trátase dunha oferta que emprega "metodoloxías de vangarda" e "axusta a formación do alumnado a un cambiante escenario laboral", xa que adapta os seus contidos "á demanda dos sectores produtivos e á sociedade".

CASE O 91% DE INSERCIÓN LABORAL

Ademais, a conselleira cifrou no case 91% a inserción laboral dos seus estudantes, aínda que ao redor dun 85% dos titulados recibiu algunha oferta de emprego por parte da compañía na que realizou o ciclo. "Estes ensinos proporcionan unha oportunidade única para o crecemento do noso tecido socioeconómico, con profesionais da máis alta cualificación, preparados para dar resposta ás necesidades da empresa", continuou, non sen antes valorar como crucial a "confianza empresarial" e "o compromiso" dos centros educativos.

Así mesmo, Pomar abordou a posta en marcha do Plan de Dinamización da FP Dual de Galicia, dotado con 5 millóns de euros co obxectivo de "lograr un maior achegamento" entre a formación e as entidades participantes.

UN "ÉXITO" PARA NAVANTIA

Durante a inauguración da xornada técnica tamén interveu o director do estaleiro de Navantia na ría de Ferrol, Jorge Filgueira Ameneiros, quen destacou o "éxito" que a FP Dual significou para a empresa: "Desde o principio fixemos unha aposta forte e cada ano que pasaba o noso compromiso foi maior, porque o resultado estaba a ser máis aló das nosas expectativas".

Nesta liña, Filgueira Ameneiros subliñou que desde os 14 alumnos que tiveron durante o primeiro ano que se sumaron ao proxecto, durante o curso 2019/2020 xa acollen a un total de 71 en catro ciclos.

Así, explicou que a suma do estaleiro de Navantia en Ferrol á FP Dual encaixa co seu plan estratéxico de "rexuvenecemento do persoal". "Debemos asegurar o mantemento do negocio", apostilou. Neste sentido, calculou que nos próximos anos xubilaranse na ría de Ferrol "ao redor de 700 persoas". Así, esperan incorporar "ao redor de 600" mozos, polo que "é importantísimo que haxa" os ciclos duais.