Pedro Puy di que Vox "está no lado oposto" ao PP nas políticas contra a violencia de xénero
O portavoz parlamentario do PPdeG restou importancia a que determinadas institucións do Estado non aprobasen declaracións institucionais con motivo do Día contra a violencia de xénero pola postura contraria de Vox.
Por Europa Press / Redacción | SANTIAGO DE COMPOSTELA | 26/11/2019 | Actualizada ás 18:23
O portavoz parlamentario do PPdeG, Pedro Puy, asegurou que, no referente ás políticas contra a violencia de xénero, o seu partido "está no lado oposto" a Vox, unha formación que "non entende, contra o consenso internacional e fronte ao sentido común e a realidade, que existe unha violencia cara ás mulleres".
Así o indicou Pedro Puy a preguntas dos medios na rolda de prensa posterior posterior á xunta de portavoces celebrada este martes na Cámara galega.
"Eu teño claro que é Vox, e creo que Feijóo tamén", manifestou o portavoz dos populares no Parlamento de Galicia, que restou importancia a que determinadas institucións do Estado non aprobasen declaracións institucionais con motivo do Día contra a violencia de xénero pola postura contraria de Vox.
"As declaracións institucionais son un instrumento excepcional que require o acordo unánime de todos", apuntou Puy, que lembrou que o Parlamento galego non aprobou unha declaración institucional polo 25N.
"Aquí non está Vox e non a houbo", apostilou o portavoz, que puxo o foco en que, a pesar diso, se produciron cinco acordos unánimes na Cámara galega en asuntos relacionados coa igualdade.
"Dito isto, o que nos confirma é que (Vox) é un grupo político que non entende, fronte a todo o consenso internacional e fronte ao sentido común e a realidade, que existe unha violencia cara ás mulleres", subliñou.
