Comeza o rescate do combustible do 'Blue Star' máis dunha semana despois do seu embarrancamento
Estiman que se poderá bombear entre cinco e oito metros cúbicos á hora da mestura de fuel e gasóleo.
Por Europa Press / Redacción | SANTIAGO DE COMPOSTELA | 30/11/2019 | Actualizada ás 15:15
O transvasamento das 105 toneladas de fuel e gasóleo que ten no seu interior o buque 'Blue Star', encallado na costa de Ares (A Coruña), iniciouse na mañá deste sábado, tras completar nos días previos todo o dispositivo para poder realizar o bombeo.
Así, segundo aseguraron fontes consultadas por Europa Press, a media mañá deste sábado activouse o proceso de transvasamento da mestura que agardaba nun tanque situado na zona de proa, onde trasladaron os combustibles desde o seu depósito habitual, situado na zona de popa.
O prime camión cisterna xa recibiu os primeiros restos de carburante. Ademais, os responsables do operativo, tanto a empresa holandesa SMIT Salvage como a subcontratada por esta, Ardentia Marine, con sede en Fene (A Coruña), estiman que o dispositivo de bombeo está preparado para poder trasladar entre cinco e oito metros cúbicos á hora.
Segundo se estableceu no plan de rescate, estas tarefas só se poderán executar mentres exista na zona unhas boas condicións de luz, e sempre en horario diúrno.
TRABALLOS NO BUQUE E EN TERRA
Ademais, segundo puido saber Europa Press, a mestura de fuel e gasóleo será trasladada ata un xestor autorizado deste tipo de carburantes, concretamente á planta que a sociedade Ingaroil ten no polígono industrial das Somozas (A Coruña).
O dispositivo de transvasamento está composto por máis de trinta operarios, que traballan tanto en terra como no propio buque sinistrado. Ademais, no mar está o remolcador 'Don Inda', que leva nas súas cubertas varias barreiras anticontaminación por se fose preciso o seu despregamento, así como outro remolcador, o 'Vehintiocho', contratado pola empresa de rescate, e que ten un cabo de unión permanente co 'Blue Star'.
