Por Europa Press / Redacción | SANTIAGO DE COMPOSTELA | 16/12/2019 | Actualizada ás 19:09
O concelleiro de Compostela Aberta Rafael Pena denunciou este luns que o actual goberno local, do socialista Xosé Sánchez Bugallo, "tan só" iniciou a licitación "de tres dos 30 proxectos" que quedaron pendentes do mandato de Martiño Noriega.
Nunha rolda de prensa no Concello, o edil avanzou que esta cuestión será levada ao pleno ordinario deste xoves para chamar a atención sobre "a escasa capacidade" do novo goberno para "mover os expedientes que quedaron pechados e que se refiren a actuacións nalgúns casos demandadas historicamente" polos veciños.
Segundo cálculos do concelleiro de Compostela Aberta, o equipo de Bugallo celebrou coa deste luns 41 xuntas de goberno local --16 extraordinarias-- nas que "só se iniciou a licitación de dous proxectos": unha senda peonil na rúa de San Martiño de Aríns e o acondicionamento do local sociocultural da Grixoa.
Ademais, quedou adxudicada a adecuación da instalación eléctrica da piscina e do ximnasio de Santa Isabel, mentres que se iniciou a licitación de Clara Campoamor.
Por todo iso, o de Compostela Aberta lamentou que "cando está a piques de acabar" o 2019, "non se saiba nada nin destes proxectos nin dos que pretende incluír" nos próximos orzamentos. En calquera caso, Pena lembrou que "existe a posibilidade de tramitar anticipos de gasto para poder iniciar" estas licitacións "e poder executar as obras nos meses de verán".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.