O temporal causa xa máis de 1.500 incidencias en Galicia e máis dun cento de inundacións en vivendas

O temporal Elsa, que afecta desde este mércores a Galicia, causou xa máis de 1.500 incidencias que tiveron que ser atendidas polos servizos de emerxencias, entre elas máis dun cento de inundacións en vivendas pola crecida dos ríos.

Segundo a información do 112-Galicia, os servizos de emerxencias rexistraron entre as 00.00 horas deste mércores e as 18,00 horas do xoves 118 inundacións en vivendas por mor da crecida dos ríos polo temporal de choiva e vento.

Con todo, as incidencias máis frecuentes neste período foron a caída de árbores e pólas nas estradas (590), seguidas das accións de prevención de risco (181). Así mesmo, producíronse 106 inundacións en vías de circulación, 95 retiradas de restos de terra e pedras na calzada, 72 caídas de cables da luz e de teléfono e varias caídas de electricidade e de teléfono.

En total, o CIAE 112 Galicia contabilizou ata a tarde deste xoves un total de 1.575 incidencias, das cales 604 se rexistraron na provincia de Pontevedra, 536 na da Coruña, 243 en Ourense e 198 en Lugo.

INCIDENCIAS DESTACADAS

Nas últimas horas, a choiva e o aumento do caudal dos ríos causou numerosas incidencias e inundacións, que se suman aos problemas xerados polo vento en vías de tren, vivendas ou colexios.

En concreto, segundo a información do 112, os ríos Ouro, Landro (Lugo), Eume, Tambre, Ulla (A Coruña), Lérez e Verdugo (Pontevedra) seguen con caudais elevados. De feito, en Val do Dubra, o alumnado do Colexio de Portomouro finalizou as clases antes de tempo para evitar que a crecida do Tambre lles impedise saír.

Por outra banda, en Ames, a estrada DP-0201 permanecía pechada ao tráfico en Ponte Maceira polo desbordamento do río Tambre. 

Ademais, Pradorramisquedo, en Viana do Bolo, atópase incomunicado, posto que o acceso a esta poboación é unha ponte que está completamente oculta pola auga. Segundo os datos facilitados ao 112 Galicia, alí hai unhas vinte vivendas, das cales dúas alagaron o seu baixo e os seus habitantes se atopaban en bo estado.

No caso de Sada (A Coruña), o desbordamento do río en Riobao provocou inundacións en Souto e Fontán, así como a caída dun noiro na estrada do Castro.

En Santiago de Compostela, unha balsa de auga foi probablemente a causante do derrube dun muro na zona de Bonaval, que danou varios coches, aínda que non houbo que lamentar feridos.

Do mesmo xeito, a caída de árbores e ramas, así como as inundacións, causaron varios problemas na circulación ferroviaria ao longo da xornada. Nestes momentos, explicou Adif, está interrompido o tráfico na liña Guillarei-Ourense.

SEN ELECTRICIDADE

Uns 3.500 usuarios galegos continuaban aínda sen subministración eléctrica a causa do temporal.

Segundo fontes de Naturgy, a última hora da tarde permanecían sen luz uns 3.500 usuarios, principalmente na provincia de Ourense. Ao comezo da tarde, a cifra superaba os 9.400 clientes.

Así mesmo, Naturgy incrementou ao longo da tarde a cifra de efectivos que traballan sobre o terreo para tratar de solucionar canto antes os cortes, e que son xa 200. Todas as incidencias están xa localizadas e en proceso de reparación.