Anova pide "arrimar o ombreiro" entre partidos para "facer fronte" ao PPdeG nas eleccións galegas
Resume as políticas "baleiras" de Albertó Núñez Feijóo como "a colonización do privado sobre o público".
Por Europa Press / Redacción | SANTIAGO DE COMPOSTELA | 05/01/2020 | Actualizada ás 16:36
O portavoz nacional de Anova, Antón Sánchez, pon a vista nas eleccións gslegas deste ano e aposta por "arrimar o ombreiro" entre os partidos políticos do Parlamento galego para "facer fronte" ao Partido Popular de Galicia.
A quen se dirixe Sánchez con estas palabras nunha entrevista na Radio Nacional Española este domingo é "a todo o que está á esquerda do PSOE" (Podemos, Esquerda Unida, BNG e En Marea), con todo sabe que a alternativa ao PP que xurda da cita electoral "será plural" e veranse "obrigados a dialogar e a entenderse" tamén co PSdeG.
O contrario "sería irresponsable" pola súa banda, aclara. A pesar de todo, quere "disputar a hexemonía ao PP" nun contexto de "diversidade e pluralidade" cunha aposta por "alianzas o máis amplas posibles para ter unha potencia maior" que permita "levar a cabo as propostas" coa "vontade de sumar".
Esta candidatura común para as autonómicas de 2020 é pola que están a traballar diferentes representantes das forzas políticas galegas. Con todo, Sánchez lembra que igual de importante é "traballar no plano político" para ofrecer unha "alternativa republicana e rupturista" como a que Anova está "disposta a construír".
Ao ser preguntado pola súa posible candidatura a presidente da Xunta, o deputado de Grupo Común da Esquerda prioriza os "acordos políticos" e que despois "se poñan as persoas que se consideren mellores para presentar ese proxecto polo que traballan", explicou.
Así é como Antón Sánchez quere "facer fronte a este dez anos de destrución do público, incremento das desigualdades e redución das posibilidades vitais para a mocidade" que, ao seu xuízo, representa o Goberno de Feijóo.
PROXECTO DO PPdeG ESGOTADO
Definiu a Xunta de Alberto Núñez Feijóo como un "Goberno letal" que "agora está a colapsar" nos "diferentes sectores e políticas públicas", algo que ratifican os "informes do idioma, a sanidade, o medio ambiente ou os datos demográficos do interior" de Galicia.
Critica a "estabilidade" á que moitas veces alude o Goberno galego que se traduce, para Sánchez, en que Galicia "estea á cola de creación de emprego, da industria, de alternativas para o futuro ou que se pechen servizos públicos" como o paritorio de Verín.
Resume as políticas deste dez anos como "a colonización do privado sobre o público e a desestruturación total a nivel de país e a nivel territorial", un proxecto "esgotado" con "cada vez menos respostas por parte de Feijóo", quen "ten que incrementar a publicidade e a propaganda fronte ao baleiro" das súas medidas.
RELANZAR A IDEA DE UNIDADE
Nun exercicio de reflexión Antón Sánchez avaliou os cambios que sufriu Anova, como a ruptura con En Marea no Parlamento galego. Cualificou este asunto como algo negativo, pero considera que "o importante é relanzar esa idea e ese proxecto político que tan ben acollido foi por moita xente" no seu momento.
O intento de unidade popular e "discurso radical" tivo "unha resposta social enorme", pero finalmente "iso non se plasmou ben no discurso parlamentario". Co que quedou de todo iso "hai que tirar para adiante, analizar os erros, ter vontade de superalos" e permitir que a xente "poida participar directamente no proxecto e proceso" de relanzamento.
Ao mesmo tempo, o portavoz nacional de Anova sabe que é necesario recuperar a confianza das persoas a través de darlles unha "voz directa e unha ferramenta política para trasladar reivindicacións" e facéndoo "con total honestidade", concluíu.
