O PPdeG acepta as transferencias que se xestionen "mellor" desde Galicia, pero rexeita "baleirar de competencias" o Estado

O portavoz parlamentario do PPdeG, Pedro Puy, esgrimiu que os populares son partidarios de que se transfiran a Galicia aquelas competencias que poidan ser "mellor xestionadas" desde a Xunta, pero non comparten a "filosofía" do BNG de concibir os traspasos de forma "unilateral" e "baleirar de competencias o Estado".

En todo caso e, tras remarcar que analizar os traspasos de competencias corresponden a Xunta e Goberno central, recoñeceu que "hai marxe para recibir algunha competencia". "É algo que teñen que acordar as administracións e pasar da formulación aos feitos", esgrimiu.

"Aceptaremos todas as transferencias que sexan xestionadas mellor desde Galicia que desde o Estado", garantiu, pero insistiu en que é preciso "facer as cousas con máxima responsabilidade" e rexeitou "baleirar de competencias" o Estado.

Como exemplo, rememorou a xestión do 'Prestige' —coa participación de medios internacionais— e incidiu en que os populares consideran que ter "a totalidade" das competencias de Salvamento Marítimo sería "prexudicial" de volver enfrontarse a unha catástrofe deste tipo.

De feito, tras mencionar a AP-9 e lembrar que nas Cortes xa hai unha lei para avanzar no traspaso que conta coa "unanimidade" do Parlamento galego, polo que se poderían ir dando pasos, advertiu que o BNG "está a ir para atrás noutras cuestións".

"Xa non falan de tarifa eléctrica galega, senón de facer un estudo, hai unha cesión", dixo.