O Goberno central prevé pagar a Galicia 7.372 millóns de entregas a conta, case tres veces menos que Cataluña

O Ministerio de Facenda prevé abonar este ano ás comunidades autónomas 103.000 millóns de euros en entregas a conta do sistema de financiamento, así como outros 10.955 millóns de euros correspondentes ao peche do exercicio de 2018. Galicia recibirá, en concreto, 7.372,77 millóns de entregas a conta.

Facenda prevé incrementar este ano o 4,46 por cento o financiamento total das comunidades autónomas, con 5.039,67 millóns máis. Tres delas situaranse á cabeza deste crecemento: Baleares (+6,83), Comunidade Valenciana (+6,77) e Cataluña (+5,22). Ademais, Canarias e Madrid situaranse tamén por enriba dese crecemento medio de financiamento, co 4,91 e o 4,79 por cento máis, respectivamente.

Os datos foron presentados polo Ministerio de Facenda tras o Consello de Ministros deste martes, no que se deu a coñecer o montante das entregas a conta do sistema de financiamento que se prevé abonar ás comunidades en 2020 e o peche de 2018. A ministra, María Jesús Montero, matizou que as cifras non son definitivas e actualizaranse coa presentación da previsión macroeconómica do proxecto de Orzamentos do Estado para 2020.

Todas as comunidades terán este exercicio un financiamento superior á de 2019. Á marxe das cinco xa mencionadas, o ascenso no resto de autonomías será menor á media do 4,46 por cento. Galicia terá un 2,99% máis de recursos; Andalucía, un 3,4% máis; Asturias, o 3,61%; Cantabria, 3,09%; A Rioxa, 2,9% máis; Murcia, 4,17%; Aragón, 4,04%; Castela-A Mancha, 3,88% máis; Estremadura, 2,91%; e Castela e León, 3,44% máis.

AS ENTREGAS A CONTA CRECEN O 0,2%

O groso do financiamento autonómico total compono as entregas a conta. Para este ano, a previsión de Facenda é abonar 103.001,55 millóns en 2020, o que supón un incremento do 0,2% con respecto ás abonadas en 2019 (201,82 millóns). Esta cifra provisional obtívose en función dun cálculo "absolutamente obxectivo", defendeu Montero, con parámetros de actualización que teñen en conta a poboación.

As entregas a conta inicialmente comunicadas rexistran un lixeiro incremento para seis comunidades. Cataluña recibirá 19.164,19 millóns (0,76% máis), Murcia obterá 3.157,56 (0,62%), a Comunidade Valenciana ingresará 9.564,54 (1,39%); Canarias, 4.583,72 millóns (0,97% máis); Baleares, 2.053 millóns (3,71% mais), e Madrid recibirá 14.529,4 millóns (0,67% máis).

A previsión para o resto de autonomías é: Galicia, 7.372,77 millóns (-0,78%); Andalucía, 19.143,24 millóns (-0,39%); Asturias, 2.719,46 millóns (-0,76); Cantabria, 1.773,21 millóns (-1,74%); A Rioxa, 957,7 millóns (-1,42); Aragón, 3.534,33 millóns (-0.17%); Castela-A Mancha, 4.914,82 millóns (-0,16%); Estremadura, 3.028,26 (-1,31%); Castela e León, 6.442,94 millóns (-0,79%).

A estas cifras engádese a previsión de liquidación do exercicio de 2018, que se pecha en 2020 e que achegará ás comunidades outros 10.955,4 millóns. En total, as autonomías recibirán 113.020,12 millóns este exercicio, á espera de novos Orzamentos que actualicen estas cifras.

Por Comunidades, Cataluña recibirá 21.295 millóns; Galicia, 7.715,67 millóns; Andalucía, 20.386,13 millóns; Asturias, 2.865,97 millóns; Cantabria, 1.857,12; A Rioxa, 1.004,55 millóns; Murcia, 3.460 millóns; Comunidade Valenciana, 11.322, 54 millóns; Aragón, 3.734,32 millóns; Castela-A Mancha, 5.204,66; Canarias, 5.463,03; Estremadura, 3.157,47; Baleares, 2.864,09; Madrid, 15.865,08 millóns; e Castela e León, 6.768,82 millóns de euros.