Lanzan unha 'app' para facilitar a busca de puntos de recarga de eléctricos
O servizo permite saber onde está a estación máis próxima ou máis barata en función da situación de cada condutor.
- O próximo reto das cidades galegas: regular o uso do patinete eléctico
- Galicia só contará con dous puntos de recarga de coche eléctrico dun total de 562 no Estado
Por E.P. | MADRID | 04/02/2020 | Actualizada ás 10:54
A marca de mobilidade e servizos conectados do Grupo PSA, Free2Move, lanzou en España a nova aplicación Free2Move Services, a través da que se ofrece acceso a unha rede de máis de 130.000 puntos de recarga de vehículos eléctricos.
A compañía explicou que o obxectivo desta ferramenta é promover e facilitar as viaxes en automóbil eléctrico ou híbrido enchufable, polo que nace para mellorar a vida dos condutores deste tipo de modelos, "dando acceso á maior rede pública de recarga eléctrica de Europa".
Esta aplicación incorpora unha función denominada Charge My Car, a través da que se identifican os puntos dispoñibles en Europa e se ofrece ao usuario a posibilidade de visualizar a ruta máis adecuada, así como de iniciar e terminar unha carga e de pagar utilizando a 'app'.
Así, en función da situación de cada condutor, poderase escoller en que punto recargar o seu vehículo, tanto elixindo a estación máis próxima, como a máis rápida ou a máis barata. Na actualidade, este servizo conta con máis de 1.000 puntos en España.
Doutra banda, a aplicación, que será compatible con todos os eléctricos e híbridos enchufables do Grupo PSA, tamén permite planificar un traxecto máis longo, como parte do obxectivo de promover a mobilidade eléctrica en desprazamentos interurbanos.
