Un ano de escola de base en galego
A escola Semente, centro para nenos de 2 a 6 anos, onde se practica a inmersión lingüística en galego, comezou o seu segundo ano con dous grupos.
Por Galicia Confidencial | Santiago | 26/09/2012 | Actualizada ás 14:53
Os organizadores desta iniciativa social de base explican que "aínda hai posibilidades de incorporar máis". Semente lanzou un vídeo co obxectivo de "pór caras ao proxecto, tanto de maes e pais usuarias do centro como de activistas".
A través das súas entrevistas podemos coñecer as razóns que fixérom xurdir a Semente hai un ano e as súas características. Ao longo do vídeo observamos tamén os distintos espazos deste centro situado no barrio compostelán de Vista Alegre. A iniciativa Semente parte da colectivo A Gentalha do Pichel, que se inspirou nas Escolas de Ensino Galego, as escolas das Irmandades da Fala que a comezos do século pasado funcionaron na Coruña, a iniciativa de Ángelo Parella e Leandro Carré. Un dos seus obxectivos é conformar "unha rede de escolas no noso idioma que asegure a pervivéncia do mesmo nas idades máis sensíbeis do desenvolvemento lingüístico, a segunda etapa do ensino infantil".
A escola aplica "unha pedagoxía crítica e respectuosa cos ritmos de aprendizaxe dos nenos é outro dos sinais de identidade desta escola, así como a coeducación, a laicidade e a interacción coa natureza".
No vídeo defínese tamén a Semente como un centro comunitario, "nin publico nin privado", onde todo o beneficio que se obtiver "invístese no proxecto, e onde existe unha bolsa de solidariedade que o fai accesíbel a familias con menos recursos".
