Detidas cinco persoas que estafaron máis de 120.000 euros na Coruña e outras tres cidades
Tamén actuaron nas provincias de Valencia, Mallorca e Cidade Real.
Por E.P. | TOLEDO | 18/02/2020 | Actualizada ás 17:40
A Garda Civil detivo tres mulleres e dous homes por supostamente estafar máis de 120.000 euros a empresas das provincias de Valencia, Mallorca, Cidade Real e A Coruña mediante a estafa bancaria coñecida como a 'fraude do CEO', con facturas falsas ou transferencias.
A operación arrincou cunha estafa de case 37.000 euros a unha cooperativa agrícola da localidade valenciana de Requena, informa o Instituto Armado nun comunicado.
Por mor deste caso, os investigadores do Equipo ROCA tiveron constancia de delitos similares en municipios de Mallorca, Cidade Real e A Coruña, con fraudes por máis de 90.000 euros en total.
Os presuntos estafadores foron arrestados nas localidades valencianas de València, Requena e Alginet. Son tres mulleres e dous homes de nacionalidades romanesa, dominicana e española, de 26 a 40 anos, detidos pola súa implicación nos delitos de estafa, branqueo de capitais e pertenza a organización criminal.
Estas persoas supostamente enviaban correos electrónicos facéndose pasar por empresas colaboradoras e indicaban outro numero bancario para realizar os pagos. Varias das súas contas foron bloqueadas e postas a disposición xudicial, tras o que as dilixencias pasaron aos xulgados de Requena.
O operativo enmárcase nas actuacións da Garda Civil para esclarecer feitos delituosos relacionados con produtos do campo dentro da provincia de Valencia.
