Por E.P. | SANTIAGO DE COMPOSTELA | 21/02/2020 | Actualizada ás 13:43
A Xunta procederá nos "próximos días" á apertura da Lagoa de Baldaio, situada en Carballo, co obxectivo de evitar futuras inundacións nas inmediacións deste espazo natural e que estas poidan afectar tamén á explotación marisqueira que se fai na zona.
A decisión de abrir a lagoa, a través dunha encomenda de carácter urxente, adoptouse tras a reunión que mantivo esta semana a mesa de traballo constituída entre as consellerías de Medio Ambiente e Mar para abordar a situación e buscar posibles solucións a curto e longo prazo.
Como resultado deste encontro, os técnicos dos dous departamentos autonómicos e do Instituto Universitario de Biodiversidade Agraria e Desenvolvemento Rural da Universidade de Santiago desprazáronse estes días a Baldaio para analizar in situ o estado da lagoa e acordar as medidas máis adecuadas.
Con iso, acordouse que a primeira acción a executar consistirá na apertura da lagoa co fin de que poida desaugar e ante a imposibilidade de que este proceso se produza, nestes momentos, de forma natural. Este mesmo venres procederase a balizar a área afectada.
Por outra banda, a xefa territorial de Medio Ambiente na Coruña, Cristina Carrión, reunirase esta tarde con representantes das asociacións ecoloxistas de Carballo que están a realizar labores de limpeza na zona, para trasladarlles os pasos que se acordaron.
Os últimos temporais rexistrados en Galicia provocaron danos nas reservas de auga de Baldaio, o que provocou tamén dificultades para o marisqueo na zona. Ante a preocupación do sector, a Xunta comprometeuse a levar a cabo actuacións de forma "inmediata" e a solicitar os correspondentes permisos ante Costas.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.