Un novo 'show' de Jácome: responde á oposición que lle gustaría que "os chistes de Lepe se contasen sobre Ourense"
"A nivel publicidade sería moi bo", di o alcalde, que expulsou a Seara (BNG) e Juana Ageitos (PSOE) dun tenso pleno que abandonaron o Bloque e Ciudadanos e no que presumiu de montar "shows políticos".
Por Europa Press / Redacción | SANTIAGO DE COMPOSTELA | 06/03/2020 | Actualizada ás 18:12
O alcalde de Ourense, Gonzalo Pérez Jácome, defendeuse ante a oposición que o acusa de ser "o hazmerreír nacional" dicindo que "oxalá fose así" porque "imaxínense o bo que sería, a nivel publicidade, que os chistes de Lepe se contasen sobre Ourense e o seu rexedor".
Así o manifestou Jácome este venres na sesión ordinaria dun tenso pleno celebrado no Concello de Ourense e que terminou co portavoz do BNG, Luís Seara, e a edil socialista Juana Ageitos expulsados dunha sesión que optaron por abandaonra os nacionalistas e o grupo de Ciudadanos.
Na sesión, correspondente ao mes de marzo e durante o debate dunha moción presentada por Ciudadanos na que se pedía "un bo comportamento e educación do alcalde nas sesións plenarias e no seu exercicio como rexedor en xeral", Jácome defendeu as súas expresións públicas, que foron afeadas polos grupos da oposición.
Así, o portavoz do grupo municipal de Ciudadanos, José Araújo, xustificou a moción presentada en base á imaxe "lamentable" que dá Ourense "constantemente en informativos nacionais" e que atribúe "á actuación do alcalde".
Neste sentido, cualificou como un "abuso de poder" por parte do rexedor ourensán que "adoita monopolizar as súas intervencións con críticas inxuriosas que superan con fartura os límites do permisible".
Pola súa banda, o portavoz do BNG, Luís Seara, lamentou que "as formas" do alcalde sexan algo "xa coñecido por todos os membros da corporación" e que ademais "as sufriron nas súas propias carnes funcionarios e representantes da cultura e outros colectivos".
No entanto, o concelleiro nacionalista criticou que a moción "poña o foco no alcalde" e non nos "verdadeiros responsables que o sustentan" sinalando aos concelleiros do Partido Popular.
"Todo o mundo sabe como se comporta o alcalde, o propio Feijóo chegou dicir antes das eleccións que Ourense só tiña dúas opcións: ter un alcalde do PP ou un show político en cada pleno", lembrou Seara.
A estas críticas, Jácome respondeu: "Se podemos, por que non ter as dúas cousas?. Pódese ter un alcalde e un show político".
O grupo municipal socialista compartiu "a preocupación" de Ciudadanos con respecto á "educación" do alcalde e o feito de que "os plenos se convertan nun circo mediático".
Neste sentido, manifestou que "non se pode dicir que a empatía e a asertividade sexan as mellores cualidades do alcalde" senón que dixo que o que "máis abunda" no salón de plenos por parte do alcalde é "o vulgar, chabacano e ordinario".
Pola súa banda, o grupo de Democracia Ourensana saíu en defensa do rexedor e presidente do partido, Gonzalo Pérez Jácome, e alegou que o documento da moción "ataca de maneira básica a dous alicerces da democracia como son a liberdade de expresión e os dereitos do alcalde como persoa que dirixe o pleno".
Finalmente, a moción non saíu adiante debido aos votos en contra do grupo de goberno conformado pola coalición de PP e DO.
