Pontón reivindica o BNG fronte a corrupción: "Non é certo que todos sexamos iguais"
"Cando nos dicían que Feijóo era un moderado, aquí dábanos un pouco a risa", comentou Pontón, quen tamén lamentou que, "se por algo se caracterizou a ultra dereita é por ser antigalega"
Por Europa Press / Redacción | PONTEVEDRA | 04/07/2025 | Actualizada ás 14:38
A portavoz nacional do BNG, Ana Pontón, reivindicou este venres a "tolerancia cero" da súa formación "fronte á corrupción doutros partidos" e insistiu en que "non é certo que todos os políticos sexan iguais".
Neste sentido, defendeu que o BNG "leva máis de 40 anos en política, xestionando institucións moi importantes, xestionando recursos públicos e sen unha soa persoa condenada por corrupción". Polo que asegurou que "hai outra forma de facer política fronte a ese bipartidismo onde a corrupción parece sistémica".
Respecto da situación política que se vive en España, Pontón fixo fincapé en que "hai que actuar con contundencia contra os casos de corrupción e dirimir todas as responsabilidades". Ademais, afeou que "a resposta que se debate agora é unha resposta moi superficial, hai que ir máis ao fondo, loitar contra esa corrupción e contra quen corrompe".
"Eu creo que o señor Sánchez debe de dar explicacións que aínda non se produciron en sede parlamentaria e, sobre todo, hai que tomar medidas para evitar que este tipo de circunstancias, que nos repugnan e que van en contra da democracia, póidanse volver repetir", sinalou Pontón este venres en Pontevedra.
Doutra banda, preguntada polo Congreso que o PP celebrará este fin de semana, a portavoz nacional do BNG referiuse a un Partido Popular "cada vez máis ultra e que quere ir da man da extrema dereita".
"Cando nos dicían que Feijóo era un moderado, aquí dábanos un pouco a risa", comentou Pontón, quen tamén lamentou que, "se por algo se caracterizou a ultra dereita é por ser antigalega".
"GRAVES PROBLEMAS SANIDADE"
Noutra orde de asuntos, Pontón rexeitou tamén a "censura" da Xunta á hora de prohibir carteis reivindicativos que denuncian falta de médicos nos centros de saúde. Nesta liña, subliñou que "o que ten que facer o PP é tomar as decisións correctas en materia sanitaria".
"O que non pode ser é que o Partido Popular queira tapar os graves problemas que ten a nosa sanidade con censura, é unha decisión antidemocrática"", concluíu Pontón.
Todo iso no transcurso dunha visita á empresa SETGA, situada no polígono pontevedrés de Ou Campiño, onde coñeceu a actividade que desenvolve no ámbito da iluminación exterior, alí defendeu a política industrial baseada na innovación "fronte ao trinomio do PP de Altri, espolio eólico e megaminería".
"Para Galicia é un orgullo poder ter empresas que están a ser punteiras, de vangarda, que están a apostar por facer as cousas ben", destacou a líder do BNG.
