A pensión media en marzo é de 857 euros, 150 euros menos que a media do Estado
A pesar de subir un 2,5% respecto de 2019, segue sendo das máis baixas do Estado.
Por Europa Press / Redacción | Santiago de Compostela | 27/03/2020 | Actualizada ás 11:28
A pensión media en Galicia incrementouse un 2,5 por cento en marzo deste ano respecto ao mesmo mes de 2019 e situouse en 856,96 euros fronte aos 1.008 do conxunto do Estado, segundo datos do Ministerio do Ministerio de Inclusión, Seguridade Social e Migracións.
Deste xeito, o aumento da pensión media, que comprende as distintas clases (xubilación, incapacidade permanente, viuvez, orfandade e a favor de familiares), foi superior ao rexistrado na media nacional, que se elevou un 2,16 por cento.
Por provincias, Lugo e Ourense presentaron as maiores subidas nas pensións medias dos seus habitantes respecto de 2019, un 2,6 por cento, seguidas pola Coruña, cun 2,4 por cento, e Pontevedra, onde se elevaron un 2,3 por cento.
Ademais, as pensións medias máis elevadas rexistráronse na Coruña e Pontevedra, onde ascenderon a 901,70 e 897,74 euros, respectivamente. Mentres, en Lugo situáronse ao redor dos 763,24 euros e en Ourense alcanzaron os 741,44 euros.
O número de pensionistas en Galicia elévase a 765.978, o que representa un 7,8 por cento do total do Estado. Así, a maior parte destas persoas residen na Coruña (299.748) e Pontevedra (242.662), mentres que o número de pensionistas domiciliadas en Lugo e Ourense é menor (115.770 e 107.798, respectivamente). Así mesmo, o total de pensionistas da comunidade elevouse un 0,2 por cento en marzo respecto dese mes de 2019.
