Asociación Defensa da Sanidade rexeita o estudo do Sergas por non haber test para profesionais

A Asociación Galega para a Defensa da Sanidade Pública mostrou este venres o seu rexeitamento ao estudo epidemiolóxico do Sergas cuns 100.000 participantes sobre o estado da inmunidade de Galicia polo COVID-19 "cando non hai test para os profesionais en contacto cos usuarios, nin para os pacientes que con síntomas leves teñen que confinarse 14 días".

Así o manifestou nun comunicado de prensa esta asociación, que critica que a Xunta atribúa "a baixa incidencia do coronavirus en Galicia á rapidez de actuación para adoptar medidas de protección" pola súa banda. "Diferentes estudos demostran que a maior ou menor incidencia e mortalidade desta pandemia en cada territorio ten que ver con múltiples factores que dificultan ou favorecen a diseminación do virus", abundou.

Neste sentido, esta asociación incide en que "Galicia forma parte das comunidades nas que as condicións de risco están máis atenuadas". Deste xeito apunta o "reducido contacto con persoas procedentes de zonas afectadas, excepto o éxodo de Madrid nos días previos ao confinamento; a dispersión poboacional e as condicións climáticas", que "dificultan a diseminación viral".

"Atribuír a menor incidencia de casos á acción do Goberno galego é unha afirmación sen fundamento e que demostra un descoñecemento profundo da epidemioloxía", subliña esta asociación, que engade que, "a pesar diso, Galicia conta con case 500 falecidos por COVID, unha cifra da que tampouco se pode presumir", sentenza.

Pola súa banda, a Asociación Galega de Medicina Familiar e Comunitaria (Agamfec) critica, ante este estudo epidemiolóxico, "o gran despregamento de medios en Atención Primaria mentres se limitou durante todo este tempo o acceso libre ás probas máis importantes para parar a propagación do virus".

Deste xeito, destaca que este tipo de estudos "teñen unha clara importancia para obter información e para poder sacar conclusións sobre as medidas a tomar". "Pero parece que, lonxe de facer unha análise técnica das posibles consecuencias, xa se dan por adiantado os supostos éxitos de políticas sanitarias que non se corresponden coa realidade", lamenta esta sociedade científica, que cre que "os estudos en medicina se deben facer para programar medidas que melloren o estado de saúde da poboación".

Neste sentido, considera que "parece incomprensible o gran despregamento de medios humanos e de tempo en Atención Primaria para este estudo mentres se limitou durante todo este tempo, e segue sendo así, o acceso libre ás probas máis importantes para parar a propagación do virus, como son a indicación das probas PCR en todo caso sospeitoso e o estudo dos seus contactos". "Medidas ambas que en outras comunidades autónomas demostraron ser as responsables directas do control da pandemia. Ante esta deficiencia estamos sen armas e pensabamos, inxenuamente, que agora poderiamos dispor delas", engadiu Agamfec.

Por iso, insiste en que hai que "contar cunha Atención Primaria dotada de ferramentas para seguir torcendo a curva de propagación do coronavirus", que, apostila, "non coñece fronteiras nin distingue administracións".

RESIDENCIAS

Así mesmo, a Asociación Galega para a Defensa da Sanidade Pública critica a actuación da Xunta "coa entrega a mans privadas das residencias xeriátricas para convertelas nun negocio" que, ao seu xuízo, "foi determinante para provocar unha altísima mortalidade polo coronavirus".

"As deficientes condicións, o déficit de persoal e a mala xestión, só centrada no beneficio económico e non no benestar dos internos, foron factores decisivos para que as mortes nestes centros representen o 40% do total de falecidos en Galicia", sostén.

Por iso, cre que o Goberno galego "non exerceu a súa obrigación de vixiar e supervisar as adecuadas condicións destas institucións". "O nivel de contaxios e mortes é moi superior nas residencias privadas que nas públicas", asegura, para concluír que "esta si que é unha competencia directa da Xunta".

Con todo, considera "inaceptable" que "responsables da Xunta, que fixo recortes inadmisibles nos recursos sanitarios, pretendan agora obter algún beneficio electoral desta desgraza, utilizando a mentira e a terxiversación da realidade".

"A prioridade máxima neste momento é deter a pandemia e tratar os afectados", reivindicou esta asociación, que lembra que "as políticas executadas desde a Xunta na última década provocaron unha seria deterioración do sistema sanitario, que se viu mermado para facer fronte á pandemia en condicións adecuadas". "O futuro da sanidade pública en Galicia depende do que fagamos para resolver esta pandemia", sentenciou.

Test realizado desde coche no Hospital Meixoeiro de Vigo para a detección do coronavirus COVID-19 | Fonte: © Miguel Núñez.