Galicia segue por encima dos 3.000 casos activos por coronavirus
No cómputo de mortos, 563, os falecidos procedentes de residencias son case a metade, 253.
Por Europa Press / Redacción | Santiago de Compostela | 03/05/2020 | Actualizada ás 12:23
O número de casos activos de COVID-19 en Galicia diminuíu en 48 entre este sábado e este domingo, ata os 3.187 casos, mentres que os pacientes curados neste tempo foron 96, o que eleva a cifra de recuperados ata os 6.075.
Estes datos da Consellería de Sanidade evidencian que os diagnósticos de coronavirus diminuíron un 1,49%, pero isto supón unha caída menor que a rexistrada a pasada xornada (3,6%) e que a anterior (3,8%). O mesmo sucede coas persoas dadas de alta, a pesar de que hai un 1,57% máis, o balance é menor que o do sábado (2,8%) e o venres (4,3%).
En todo caso, os datos publicados xa se adaptan desde o mércores á metodoloxía do Ministerio de Sanidade para incluír o balance total de curados --suma altas hospitalarias e epidemiolóxicas--.
Dos 3.187 casos activos na Comunidade, 771 correspóndense coa área sanitaria da Coruña, 222 coa de Lugo, 613 coa de Ourense, 186 coa de Pontevedra, 773 coa área de Vigo, 475 coa de Santiago e 147 coa área sanitaria de Ferrol.
Do total de pacientes positivos, 36 permanecen en UCI (un menos que o sábado), 255 están en unidades de hospitalización e 2.896 permanecen nos seus domicilios.
Ata o momento, Sanidade destacou que en Galicia hai 6.075 persoas curadas e que o número de total de PCR realizados ata a data ascende a 103.116.
CASOS EN RESIDENCIAS
Do total de casos, a Consellería de Sanidade detalla que 919 están vinculados a residencias de maiores (617 usuarios e 302 profesionais). E que no cómputo de mortos (563), os falecidos procedentes de residencia son case a metade (253).
Así, o departamento autonómico destaca o número de casos de coronavirus detectados en centros residenciais de servizos sociais de Galicia supoñen o 2,5% do total das persoas residentes.
