Por Europa Press / Redacción | SANTIAGO DE COMPOSTELA | 06/05/2020 | Actualizada ás 11:21
Galicia rexistrou a constitución de 96 sociedades mercantís en abril, o que supón un afundimento do 75% respecto das 388 do mesmo mes de 2019, segundo os datos que publica este mércores o Instituto Galego de Estatística (IGE).
Do total, 95 empresas adoptaron a forma de sociedade limitada, mentres só unha foi doutro tipo. O capital medio subscrito por cada sociedade foi de máis de 235.000 euros. Por provincias, a maior parte das 96 empresas creouse en abril na Coruña (41), seguida de Pontevedra (27), Lugo (18) e Ourense (10).
O 25% das empresas creadas en abril pertencen á rama do comercio, seguida da construción (13,5%), actividades inmobiliarias e financeiras (10,4%) e hostalaría e actividades profesionais (9,4%). A presenza do sexo masculino segue sendo maioritaria como en meses precedentes: 109 socios (o 79,56% do total fronte ás 28 socias (20,44%). Case o 69% constituíronse por un só socio e 17,7% por dous.
MENOS DISOLUCIÓNS
Por outra banda, ampliaron capital por 5,6 millóns de euros un total de 26 empresas, o que supón un esborralle interanual do 88,8% no número de compañías.
Tamén hai unha caída acusada das disolucións, xa que só houbo 28 no cuarto mes, o que supón 146 menos que hai un ano. Este mes non houbo ningunha fusión nin escisión, mentres catro empresas reduciron capital. O mes de abril pechou con catro sociedades afectadas por concurso de acredores, un descenso significativo respecto das 18 que había un ano antes.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.