O oso volve recuperar parte dos espazos que tiña hai dous séculos

A Asociación para a Defensa Ecolóxica de Galicia (Adega) instou á Xunta a aprobar de forma "inmediata" o plan de recuperación do oso pardo na comunidade e denunciou que o proxecto e o borrador do decreto "levan gardados nun caixón desde 2013".

A través dun comunicado, a entidade ecoloxista valorou a constatación da presenza da especie no Macizo Central e o Parque Natural do Invernadoiro nos últimos meses mediante gravacións. Por este motivo, reclamou ao Goberno galego que verifique estas imaxes e que poña en marcha medidas de seguimento e protección destes mamíferos.

Neste sentido, remarcou a importancia da presenza de osos pardos na comunidade dado que se trata dunha especie en perigo de extinción a nivel estatal e autonómico. Tamén destacou o feito de que se rexistraron en zonas afastadas das contempladas no documento previo do plan de recuperación, polo que chamou a ampliar as áreas de osos a serras non contempladas.

Así mesmo, a asociación lembrou que se localizaron exemplares en Pena Trevinca hai algunhas semanas. Esta situación, leva, ao seu xuízo, que sexa "urxente" contar cun plan para iniciar a súa recuperación do que asegurou que xa se dispón noutras comunidades da Cordilleira Cantábrica e as montañas de Zamora e o Norte de Portugal.

Aínda que valorou o desenvolvemento da investigación do 'Proxecto Life Oso Courel', que se iniciou en 2017 e que se espera que conclúa a finais deste ano, incidiu en que non pode representar "unha alernativa ao decreto de recuperación da especie". Tamén insistiu na necesidade de que se engadan as modificacións da zonificación presentadas na fase de exposición pública, así como de que se inclúa unha partida para a súa execución nos orzamentos autonómicos.

Oso pardo filmado no Macizo Central Ourensán. ZEITUN FILMS