Os establecementos hostaleiros de Galicia poderán abrir á metade da súa capacidade a partir da próxima semana
O 50 por cento dos establecementos xa están en funcionamento e as reservas de aloxamento para verán superan as cancelacións.
Por Europa Press / Redacción | SANTIAGO DE COMPOSTELA | 26/05/2020 | Actualizada ás 17:58
Os establecementos hostaleiros de Galicia poderán abrir á metade da súa capacidade habitual a partir da próxima semana, segundo informa a Xunta tras a reunión mantida este martes polo conselleiro de Cultura e Turismo, Román Rodríguez, con representantes do sector.
A medida prevé aprobarse definitivamente na próxima reunión do Centro de Coordinación Cooperativa (Cecop) deste fin de semana, co que podería aplicarse xa a partir do luns 1 de xuño.
Así, cafetarías, bares e restaurantes poderán abrir ao 50% da súa capacidade en virtude as instrucións publicadas no Boletín Oficial do Estado (BOE) para as zonas que se atopen en fase dúas da desescalada, situación na que están as catro provincias galegas.
Ademais desta medida, na reunión —que contou coa participación da directora da Axencia Turismo de Galicia, Nava Castro, e de representantes do Clúster Turismo de Galicia e asociacións de empresarios e hostalaría— tamén abordou outros asuntos, como as expectativas de cara á tempada de verán.
Co ingreso de toda Galicia en fase dúas, a metade dos establecementos de restauración retomaron a súa actividade e espérase que nos próximos días se incorporen máis, segundo o trasladado ao termo da reunión.
No tocante ás previsións nos negocios de aloxamento para o verán, o sector destaca que, nestes momentos, as reservas xa superan a cifra de cancelacións.
